Bugungi shou-biznes sohasida dabdabali va hashamatga to‘la hayot tarzini ko‘z-ko‘z qilish ko‘plab mashhurlar orasida odatga aylangan. Ba’zan bunday “obraz” moliyaviy ahvoli izdan chiqqan san’atkorlar uchun o‘z obro‘sini saqlab qolish vositasiga aylanadi. Asl haqiqat esa ko‘pincha ekran ortida qoladi. Quyida moliyaviy muammolarini yashirish uchun muxlislar ko‘z o‘ngida o‘zini badavlat qilib ko‘rsatgan san’atkorlar haqida so‘z boradi.
Kardashyanlar oilasi: boylik brendga aylanganda
Opa-singil Kardashyanlar bugungi kunda g‘arb pop madaniyatida muvaffaqiyatning yaqqol namunasi sifatida qabul qilinadi. Ularning realiti-shoulari, reklama shartnomalari va modaga oid loyihalari orqali daromadlari millionlab dollarni tashkil etadi. Ammo barchasi ko‘ringanidek go‘zal bo‘lmaydi.
Masalan, mashhur “Kardashyanlar oilasi” shousi suratga olingan va barcha havas qilgan hashamatli uy aslida ularga tegishli emasligi keyinchalik ma’lum bo‘lgan. Xonadon uzoq muddatli shartnoma asosida ijaraga olingan.
Shuningdek, tarmoqlarda pulni havoga sovurishga tayyor turgandek ko‘ringan Kim Kardashyan aslida juda ziqna bo‘lib chiqqan: u bir necha bor o‘z ishchilari tomonidan sudga berilgan, chunki u qo‘l ostidagi xodimlariga ish haqini o‘z vaqtida bermagan, ularni og‘ir mehnat sharoitlarida ishlashga majbur qilgan va adolatsizlik qilgan.
50 Cent: sahnada badavlat — hayotda esa bankrot
50 Cent taxallusi bilan tanilgan reper Kertis Jekson uzoq yillar davomida badavlat va muvaffaqiyatli shaxs sifatida ko‘rilgan. U tungi klublarda pul sochar, hashamatli mashinalar minar, yirik zargarlik buyumlari va qimmatbaho uylar xarid qilar edi. Biroq 2015-yilda u to‘satdan bankrotligini e’lon qilgach, ko‘plab muxlislarni hayratda qoldirdi.
Sud hujjatlariga ko‘ra, xonanda 23 million dollardan ortiq qarzni to‘lashi kerak bo‘lgan. Qizig‘i shundaki, aynan o‘sha yili Forbes uni eng daromadli hip-hop ijodkorlar ro‘yxatiga kiritgan edi. Ammo Jeksonning o‘zi bu reytingni “ko‘zbo‘yamachilik” deb atagan. Sudda reper ijtimoiy tarmoqlarda hashamatli hayotni faqatgina ko‘z-ko‘z qilish uchun namoyon qilganini aytgan va
“Avtomobillar va zargarlik buyumlarini keyinroq do‘konlarga qaytarardim”, deya tan olgan.
Bugungi kunda vaziyat o‘zgargan. 50 Cent qarzlardan to‘liq qutulgan. Ayni paytda uning boyligi 300 million dollarga yaqinlashgan.
Mayk Tayson: oltin taxtdan moliyaviy qulashgacha
Bokschi Mayk Taysonning hayoti “noldan boshlab muvaffaqiyatga erishgan”lar qatoriga kiradi. U bolalikdagi qashshoqlik va jinoyat olamidan professional sport orqali chiqib, dunyoning eng taniqli bokschilaridan biriga aylandi. Millionlab daromadlar, hashamatli hayot, qimmatbaho xaridlar — bularning barchasi sportchi kundalik hayotining bir qismi bo‘lgan.
Tayson hashamatli uylar, qimmat avtomobillar, dizaynerlik kiyimlari va hattoki uchta Bengal yo‘lbarsini xarid qilgan. Tayson keyinchalik bu haqida shunday degan edi:
“Men bolalikdagi bo‘shliqni mol-dunyo bilan to‘ldirmoqchi bo‘ldim, ammo bu chuqurlikni hech qanday pul to‘ldirmas ekan”.
2003-yilda Tayson moliyaviy inqirozga uchradi. U 23 million dollardan ortiq qarzga botdi va o‘zini bankrot deb e’lon qildi. Bu davr sportchini ruhiy tushkunlikka olib keldi. Biroq u o‘zini tiklay oldi va 2016-yildan boshlab moliyaviy holatini yaxshiladi. 2020-yilda esa bokschi ringga qaytdi.
Jastin Biber: hashamat libosi ostiga yashiringan qarzlar
Jastin Biber karyerasining ilk yillarida oddiy va ko‘ngilchan yigit obrazida tanilgan bo‘lsa, bugun u brend kiyimlar, turli tatuirovkalar va hashamatli avtomobillarga ega mashhur shaxsga aylangan. U ijtimoiy tarmoqlarda turli sayohatlar, ziyofatlar va qimmatbaho sovg‘alar bilan tez-tez bo‘lishib turadi.
Ammo bunday soxta obraz ortida moliyaviy qiyinchiliklar borligi haqida mish-mishlar ko‘paymoqda. 2022-yilda Biber “Justice Tour” gastrolini bekor qildi, hech qanday yangi qo‘shiq yozmadi va konsertlarda ishtirok etmadi. O‘sha yili u o‘zining musiqiy katalogi huquqlarini sotdi va moliyaviy inqirozga kelganini tan oldi. 2025-yil boshida esa uning bankrotlik yoqasida ekani haqida xabarlar paydo bo‘ldi.
Biber bu da’voni rad etdi, ammo do‘stlari va hamkasblarining aytishicha, xonanda 31,5 million dollarga yaqin qarzga ega. Ayrim ijtimoiy tarmoq foydalanuvchilari hazil aralash: “Jastinni aslida xotini Heyli boqyapti”, degan izohlarni qoldirdi, chunki uning kosmetika brendi va biznes loyihalari yaxshi natijalar ko‘rsatmoqda.
Izoh (0)