Бугунги шоу-бизнес соҳасида дабдабали ва ҳашаматга тўла ҳаёт тарзини кўз-кўз қилиш кўплаб машҳурлар орасида одатга айланган. Баъзан бундай “образ” молиявий аҳволи издан чиққан санъаткорлар учун ўз обрўсини сақлаб қолиш воситасига айланади. Асл ҳақиқат эса кўпинча экран ортида қолади. Қуйида молиявий муаммоларини яшириш учун мухлислар кўз ўнгида ўзини бадавлат қилиб кўрсатган санъаткорлар ҳақида сўз боради.
Кардашьянлар оиласи: бойлик брендга айланганда
Опа-сингил Кардашьянлар бугунги кунда ғарб поп маданиятида муваффақиятнинг яққол намунаси сифатида қабул қилинади. Уларнинг реалити-шоулари, реклама шартномалари ва модага оид лойиҳалари орқали даромадлари миллионлаб долларни ташкил этади. Аммо барчаси кўринганидек гўзал бўлмайди.
Масалан, машҳур “Кардашьянлар оиласи” шоуси суратга олинган ва барча ҳавас қилган ҳашаматли уй аслида уларга тегишли эмаслиги кейинчалик маълум бўлган. Хонадон узоқ муддатли шартнома асосида ижарага олинган.
Шунингдек, тармоқларда пулни ҳавога совуришга тайёр тургандек кўринган Ким Кардашьян аслида жуда зиқна бўлиб чиққан: у бир неча бор ўз ишчилари томонидан судга берилган, чунки у қўл остидаги ходимларига иш ҳақини ўз вақтида бермаган, уларни оғир меҳнат шароитларида ишлашга мажбур қилган ва адолатсизлик қилган.
50 Cent: саҳнада бадавлат — ҳаётда эса банкрот
50 Cent тахаллуси билан танилган рэпер Кертис Жексон узоқ йиллар давомида бадавлат ва муваффақиятли шахс сифатида кўрилган. У тунги клубларда пул сочар, ҳашаматли машиналар минар, йирик заргарлик буюмлари ва қимматбаҳо уйлар харид қилар эди. Бироқ 2015 йилда у тўсатдан банкротлигини эълон қилгач, кўплаб мухлисларни ҳайратда қолдирди.
Суд ҳужжатларига кўра, хонанда 23 миллион доллардан ортиқ қарзни тўлаши керак бўлган. Қизиғи шундаки, айнан ўша йили Forbes уни энг даромадли ҳип-ҳоп ижодкорлар рўйхатига киритган эди. Аммо Жексоннинг ўзи бу рейтингни “кўзбўямачилик” деб атаган. Судда рэпер ижтимоий тармоқларда ҳашаматли ҳаётни фақатгина кўз-кўз қилиш учун намоён қилганини айтган ва
“Автомобильлар ва заргарлик буюмларини кейинроқ дўконларга қайтарардим”, дея тан олган.
Бугунги кунда вазият ўзгарган. 50 Cent қарзлардан тўлиқ қутулган. Айни пайтда унинг бойлиги 300 миллион долларга яқинлашган.
Майк Тайсон: олтин тахтдан молиявий қулашгача
Боксчи Майк Тайсоннинг ҳаёти “нолдан бошлаб муваффақиятга эришган”лар қаторига киради. У болаликдаги қашшоқлик ва жиноят оламидан профессионал спорт орқали чиқиб, дунёнинг энг таниқли боксчиларидан бирига айланди. Миллионлаб даромадлар, ҳашаматли ҳаёт, қимматбаҳо харидлар — буларнинг барчаси спортчи кундалик ҳаётининг бир қисми бўлган.
Тайсон ҳашаматли уйлар, қиммат автомобиллар, дизайнерлик кийимлари ва ҳаттоки учта Бенгал йўлбарсини харид қилган. Тайсон кейинчалик бу ҳақида шундай деган эди:
“Мен болаликдаги бўшлиқни мол-дунё билан тўлдирмоқчи бўлдим, аммо бу чуқурликни ҳеч қандай пул тўлдирмас экан”.
2003 йилда Тайсон молиявий инқирозга учради. У 23 миллион доллардан ортиқ қарзга ботди ва ўзини банкрот деб эълон қилди. Бу давр спортчини руҳий тушкунликка олиб келди. Бироқ у ўзини тиклай олди ва 2016 йилдан бошлаб молиявий ҳолатини яхшилади. 2020 йилда эса боксчи рингга қайтди.
Жастин Бибер: ҳашамат либоси остига яширинган қарзлар
Жастин Бибер карьерасининг илк йилларида оддий ва кўнгилчан йигит образида танилган бўлса, бугун у бренд кийимлар, турли татуировкалар ва ҳашаматли автомобилларга эга машҳур шахсга айланган. У ижтимоий тармоқларда турли саёҳатлар, зиёфатлар ва қимматбаҳо совғалар билан тез-тез бўлишиб туради.
Аммо бундай сохта образ ортида молиявий қийинчиликлар борлиги ҳақида миш-мишлар кўпаймоқда. 2022 йилда Бибер “Justice Tour” гастролини бекор қилди, ҳеч қандай янги қўшиқ ёзмади ва концертларда иштирок этмади. Ўша йили у ўзининг мусиқий каталоги ҳуқуқларини сотди ва молиявий инқирозга келганини тан олди. 2025 йил бошида эса унинг банкротлик ёқасида экани ҳақида хабарлар пайдо бўлди.
Бибер бу даъвони рад этди, аммо дўстлари ва ҳамкасбларининг айтишича, хонанда 31,5 миллион долларга яқин қарзга эга. Айрим ижтимоий тармоқ фойдаланувчилари ҳазил аралаш: “Жастинни аслида хотини Ҳейли боқяпти”, деган изоҳларни қолдирди, чунки унинг косметика бренди ва бизнес лойиҳалари яхши натижалар кўрсатмоқда.
Изоҳ (0)