Germaniya tashqi ishlar vaziri Yoxann Vadeful Isroilga tashrifi davomida GFRning G‘azo sektoridagi och qolgan aholiga yordamni kengaytirayotganini va BMTning Jahon oziq-ovqat dasturiga (WFP) qo‘shimcha 5 million yevro ajratilishini e’lon qildi.
“Biz G‘azo sektorida Jahon oziq-ovqat dasturini qo‘llab-quvvatlash uchun qo‘shimcha 5 million yevro ajratamiz. Bu, boshqa narsalar qatori, G‘azo aholisini o‘rta muddatli istiqbolda non va issiq ovqat bilan ta’minlash maqsadida novvoyxonalar va umumiy ovqatlanish shoxobchalarini qo‘llab-quvvatlaydi”, deydi Vadeful.
“G‘azo sektoridagi gumanitar falokatga darhol chek qo‘yish lozim”, deya ta’kidladi u.
Shu bilan birga, Germaniya TIV rahbari Isroil hukumatini G‘azo sektoriga gumanitar yordam ko‘rsatish sohasida BMT va uning tashkilotlari bilan yaqin hamkorlikni iloji boricha tezroq tiklashga chaqirgan.
Vadeful yordamning bir qismi HAMAS harakatiga o‘tib qolishi mumkinligini inkor etmagan.
“G‘azo sektoridagi gumanitar falokat shu qadar keng ko‘lamliki, bu yerda qo‘shimcha to‘siqlar yaratish maqsadga muvofiq emas. Suiiste’mollikning oldini olishning eng yaxshi usuli G‘azo sektoriga imkon qadar ko‘proq oziq-ovqat va gumanitar yordam yetkazib berishdir”, deya ta’kidlagan vazir.
Germaniya Tashqi ishlar vazirligi ma’lumotlariga ko‘ra, 2023-yil oktyabr oyida G‘azodagi urush boshlanganidan beri Germaniya tomonidan Falastin hududlariga ko‘rsatilgan gumanitar yordam hajmi 330 million yevrodan oshgan. Ushbu summaning 95 foizdan ortig‘i G‘azo sektori aholisi uchun sarflanmoqda.
Bundan avval Germaniya Iordaniya bilan hamkorlikda G‘azo sektori aholisiga insonparvarlik yordami ko‘rsatish maqsadida “havo ko‘prigi” tashkil etishi xabar qilingandi.
Izoh (0)