Germaniya va Iordaniya G‘azo aholisiga yordam berish uchun “havo ko‘prigi” tashkil qiladi

Germaniya Iordaniya bilan hamkorlikda G‘azo sektori aholisiga insonparvarlik yordami ko‘rsatish maqsadida “havo ko‘prigi” tashkil etmoqda. Bu haqda Germaniya Federal kansleri Fridrix Merts asosiy vazirliklar va xavfsizlik idoralari rahbarlari ishtirokidagi norasmiy organ — Xavfsizlik kengashi yig‘ilishidan so‘ng jurnalistlarga ma’lum qildi.

“Germaniya hukumati Iordaniya bilan hamkorlikda G‘azo ustidan insonparvarlik yordamini yetkazib berish uchun darhol “havo ko‘prigi” tashkil etmoqda. Mudofaa vaziri Boris Pistorius oziq-ovqat va dori-darmonlar uchun bunday “havo ko‘prigi”ni ta’minlashga tayyor bo‘lgan Fransiya va Buyuk Britaniya bilan harakatlarni yaqindan muvofiqlashtiradi. G‘azodagi tinch aholining azob-uqubatlariga iloji boricha tezroq barham bermoqchimiz”, dedi Merts.

Shuningdek, kansler yig‘ilishda Falastin davlatchiligini tan olish masalasi ham muhokama qilinganini ma’lum qilgan.

“GFR hukumati hozircha bu borada qaror qabul qilish niyatida emas. Biz Falastin davlatini tan olishni birinchi emas, balki ikki davlat yechimini amalga oshirish yo‘lidagi ehtimoliy so‘nggi qadamlardan biri sifatida ko‘rmoqdamiz”, dedi Merts.

Bundan avval 2023-yil 7-oktyabrdan buyon Isroilning G‘azodagi urushi oqibatida Birlashgan Millatlar Tashkilotining 300 nafardan ortiq xodimi halok bo‘lgani xabar qilingandi.

Buyuk Britaniya bosh vaziri Kir Starmer zudlik bilan G‘azo sektoriga gumanitar yordam yuborilishini ma’lum qilgandi. 

Isroil mudofaa kuchlari 27-iyul kuni erta tongda G‘azoga yordam kiritish boshlanganini e’lon qilgan. Jumladan, sektorga havodan un, shakar va konservalardan iborat 7 ta yordam paketi tashlangani ochiqlangan. Shuningdek, yahudiy davlati 27-iyul kuni soat 10:00 dan 20:00 gacha (O‘zbekiston vaqti bilan 12:00 dan 22:00 gacha) Al-Mavosiy, Dayr-al-Balo va G‘azo shaharlarida gumanitar yordam kirishi uchun tinchlik o‘rnatilib, o‘t ochish to‘xtatilishini ma’lum qilgan.

Buyuk Britaniya G‘azoga avval ham gumanitar yordam tarqatish sa’y-harakatlarida ishtirok etgan. Mamlakat 2024-yili Iordaniya bilan birgalikda G‘azo shimoliga dori-darmon, oziq-ovqat va yoqilg‘i kabi tonnalab yuklarni parashyut orqali tashlagandi.