“So‘nggi kunlardagi issiq ob-havo 70 foizga yaqin aholi uyqusiga salbiy taʼsir qilmoqda” — iqlimshunos

O‘zbekistonda so‘nggi kunlarda kuzatilayotgan issiq ob-havo muhiti aksar aholi uyqusiga salbiy taʼsir qilmoqda. Bu haqda iqlimshunos Erkin Abdulahatov o‘z Telegram kanalida o‘tkazgan so‘rov natijasidan kelib chiqib fikr bildirdi.

Erkin Abdulahatovning yozishicha, kanalda o‘tkazilgan so‘rovnomada 1 ming 550ga yaqin kishi faol qatnashgan. Ishtirokchilarning 70 foizga yaqini so‘nggi kunlarda kuzatilayotgan issiqlik to‘lqinlari ularning uyqu rejimini o‘zgartirayotganini taʼkidlagan.

“To‘g‘ri, so‘rovnoma natijasi ushbu omilning uyqu rejimiga taʼsirini to‘liq shunday ekanini anglatmaydi. Buning uchun chuqur ilmiy tadqiqotlar kerak. Shunda aholi qatlamlari, yosh chegaralari bo‘yicha joriy noodatiy davomli issiqlik bizning uyqularimizga qay tarzda taʼsir o‘tkazayotganini bilib olamiz. Ammo, ushbu so‘rovnoma natijalari ham butun boshli bir tadqiqot uchun eng qimmatli maʼlumot bo‘lishi mumkin”, deya post qoldirgan mutaxassis.

Iyul oyida O‘zbekistonda jazirama kunlar, anomal issiq havo avvalgi davrlarga nisbatan uzoq davom etayotgani aytilmoqda. Hatto tungi vaqtda ham havo sezilarli issiq bo‘lmoqda. Kunduz kunlari +40 darajadan yuqori haroratli soatlar o‘tmishdagidan ko‘proq. Erkin Abdulahatov fikricha, mamlakatda yangicha iqlimiy davr boshlanyapti.

“Hozirgi kunlar tabiiyki, start yoki finish emas. Kelajakda tez—tez to‘qnashadigan holatlar. Buning uchun to‘g‘ri harakat qilish, organizmni “yangicha” tashqi muhitga asta moslab borish kerak. Uning uchun nima bilan to‘qnashish kelayotganimizni anglashimiz, qanday kurashish kerakligini bilishimiz kerak”, deb yozgan olim.

Masalan, joriy yil 19-iyul kuni Navoiy, Buxoro va Termiz shaharlarida havo harorati +43 daraja va undan yuqoriga ko‘tarildi. Toshkent shahrida ham harorat besh kun ketma–ket 41 daraja va undan yuqoriga isimoqda.

Hatto 22-iyul kuni soat 20:00 holatiga ko‘ra, poytaxt va Qarshi shahrida respublikadagi eng issiq havo — 36,5 daraja kuzatildi. Shu kuni mamlakatda harorat o‘rtacha 38-43 daraja issiq bo‘ldi.

“O‘zgidromet” joriy yil 23–27-iyul kunlari respublikada harorat biroz pasayishini prognoz qildi. Jumladan, 23-iyul kuni kunduzi havo 38-40 daraja, 24-25-iyulda 37-42 daraja, 26-27-iyul kunlari 33-38 daraja issiq bo‘lishi kutilmoqda.