“Сўнгги кунлардаги иссиқ об-ҳаво 70 фоизга яқин аҳоли уйқусига салбий таъсир қилмоқда” — иқлимшунос

Ўзбекистонда сўнгги кунларда кузатилаётган иссиқ об-ҳаво муҳити аксар аҳоли уйқусига салбий таъсир қилмоқда. Бу ҳақда иқлимшунос Эркин Абдулаҳатов ўз Telegram каналида ўтказган сўров натижасидан келиб чиқиб фикр билдирди.

Эркин Абдулаҳатовнинг ёзишича, каналда ўтказилган сўровномада 1 минг 550га яқин киши фаол қатнашган. Иштирокчиларнинг 70 фоизга яқини сўнгги кунларда кузатилаётган иссиқлик тўлқинлари уларнинг уйқу режимини ўзгартираётганини таъкидлаган.

“Тўғри, сўровнома натижаси ушбу омилнинг уйқу режимига таъсирини тўлиқ шундай эканини англатмайди. Бунинг учун чуқур илмий тадқиқотлар керак. Шунда аҳоли қатламлари, ёш чегаралари бўйича жорий ноодатий давомли иссиқлик бизнинг уйқуларимизга қай тарзда таъсир ўтказаётганини билиб оламиз. Аммо, ушбу сўровнома натижалари ҳам бутун бошли бир тадқиқот учун энг қимматли маълумот бўлиши мумкин”, дея пост қолдирган мутахассис.

Июль ойида Ўзбекистонда жазирама кунлар, аномал иссиқ ҳаво аввалги даврларга нисбатан узоқ давом этаётгани айтилмоқда. Ҳатто тунги вақтда ҳам ҳаво сезиларли иссиқ бўлмоқда. Кундуз кунлари +40 даражадан юқори ҳароратли соатлар ўтмишдагидан кўпроқ. Эркин Абдулаҳатов фикрича, мамлакатда янгича иқлимий давр бошланяпти.

“Ҳозирги кунлар табиийки, старт ёки финиш эмас. Келажакда тез—тез тўқнашадиган ҳолатлар. Бунинг учун тўғри ҳаракат қилиш, организмни “янгича” ташқи муҳитга аста мослаб бориш керак. Унинг учун нима билан тўқнашиш келаётганимизни англашимиз, қандай курашиш кераклигини билишимиз керак”, деб ёзган олим.

Масалан, жорий йил 19 июль куни Навоий, Бухоро ва Термиз шаҳарларида ҳаво ҳарорати +43 даража ва ундан юқорига кўтарилди. Тошкент шаҳрида ҳам ҳарорат беш кун кетма–кет 41 даража ва ундан юқорига исимоқда.

Ҳатто 22 июль куни соат 20:00 ҳолатига кўра, пойтахт ва Қарши шаҳрида республикадаги энг иссиқ ҳаво — 36,5 даража кузатилди. Шу куни мамлакатда ҳарорат ўртача 38-43 даража иссиқ бўлди.

“Ўзгидромет” жорий йил 23–27 июль кунлари республикада ҳарорат бир оз пасайишини прогноз қилди. Жумладан, 23 июль куни кундузи ҳаво 38-40 даража, 24-25 июлда 37-42 даража, 26-27 июль кунлари 33-38 даража иссиқ бўлиши кутилмоқда.