Bugun, 22-iyul kuni prezident Shavkat Mirziyoyev boshchiligidagi hukumat delegatsiyasi Jizzax viloyatiga tashrif buyurdi. Kun davomida davlat rahbariga hududdagi sanoat va ijtimoiy sohalarda bajarilayotgan ishlar, yangi ochilgan korxonalar to‘g‘risida axborot berildi.
Prezident matbuot xizmati xabariga ko‘ra, tashrif doirasida Zomin tumanidagi yangi loyihalar ko‘zdan kechirilgan. Xususan, delegatsiya yangi ochilgan, “yagona darcha” tamoyili asosida qishloq xo‘jaligi xizmatlarini bitta joyga jamlagan “Agromarkaz”da bo‘ldi. Xabarda qayd etilishicha, hosildorlikni oshirishga qaratilgan yangicha yondashuvlar viloyatda oziq-ovqat mahsulotlari sifatiga ijobiy taʼsir etib, aholini ko‘proq daromad topishiga imkon yaratmoqda.
“Jizzax viloyati kartoshkachilikni rivojlantirishga zamin qilib olinmoqda. Bugungi kunda Zomin ilmiy tajriba stansiyasida xorijiy va mahalliy seleksiyaga mansub 12 ta nav birlamchi urug‘chiligi yo‘lga qo‘yildi. Odatda urug‘lik kartoshka yetishtirish 6–7 yilni va 8 ta bosqichni talab qilsa, yangi taklifga ko‘ra, jarayon 4 bosqichga kamaytirilib, ikki yilda tayyorlanadi. Bunda kartoshkaning yangi seleksiya navlaridan 12 tonna yuqori avlod super elita urug‘lik aholi xonadonlariga bepul tarqatiladi. Natijada 120 tonna elita kartoshka urug‘ligi yetishtiriladi”, deyiladi manba xabarida.
Tahlil qilinishicha, Jizzaxning turfa tabiati, tog‘li va cho‘l hududlari yilning to‘rt faslida ham sayohat qilish imkonini beradi. “Zomin” turistik-rekreatsion zonasi, Zomin aeroporti va yangi yo‘llar bu imkoniyatlarni kengaytirdi. Yirik oltita kanal bo‘yida sayilgohlar tashkil qilingan. Endi “Aydar-Arnasoy” ko‘llar tizimi qirg‘oq bo‘yida ham zamonaviy turizm markazi barpo etiladi.
“Tumanlarga sanoatni olib kirib, odamlarni ishli qilishga harakat qilyapmiz. Ilgari dasht bo‘lgan joylarda zamonaviy korxonalar paydo bo‘lyapti. Odamlarimiz hunaridan, tomorqasidan ham daromad topyapti. Lekin bu bugungi natija. Yangi avlod yetishib kelyapti, yoshlarimizning bilimi, talabi oshib boryapti. Ularning ishlashi, yaxshi yashashi uchun hozirdan zamin yaratishimiz kerak. Agar imkoniyatlardan to‘g‘ri foydalanilsa, Zomin tumani ishsizlikdan xoli hudud bo‘la oladi”, degan Shavkat Mirziyoyev.
Tashrif davomida Zomin tumanida qurilishi rejalashtirilgan madaniyat saroyi va sanʼat maktabi to‘g‘risida ham axborot berilgan. Manbaga ko‘ra, madaniyat saroyi 300 o‘rinli bo‘lib, tuman markazidagi 45 mingdan ortiq aholiga xizmat ko‘rsatadi. Bu yerda “Zomin sayqali” folklor-etnografik jamoasi, 13 ta to‘garak faoliyat yuritadi. Mutasaddilarga ushbu rejalar ijrosi, ijtimoiy-iqtisodiy sohalar rivoji bo‘yicha topshiriqlar berilgan.
Maʼlumot uchun, prezident qarori bilan Jizzax viloyatiga 2025-yilda ikki milliard dollar investitsiya jalb etish ko‘zda tutilgan. Shuningdek, viloyat eksporti hajmini 285 million dollarga yetkazish, 168 ming odamni ishli qilish chora-tadbirlari belgilangan. Bu vazifalar ijrosi doirasida joriy yilning I yarmida Jizzaxda sanoat, servis va qishloq xo‘jaligida 200 ta loyiha ishga tushgan. Viloyatga 662 million dollar investitsiya kirib kelgan.
Izoh (0)