Germaniya aeroporti bojxonachilari 14-iyul kuni qandolat qutilariga yashirilgan 1 500 ga yaqin tarantula (o‘rgimchak) musodara qilingani haqida ma’lumot berdi. Bu haqda Euronews xabar qildi.
Bojxona xodimlari tarantula to‘la yukni Kyoln-Bonn aeroportiga Vyetnamdan kelgan paket ichidan topgan. Boshqarma matbuot kotibi Yens Ahlandning ta’kidlashicha, 7 kilogrammlik qandolat mahsulotlaridan “o‘zgacha” hid taralgan.
“Aeroportdagi hamkasblarim har qanday turdagi taqiqlangan mahsulotlarga guvoh bo‘lgan. Ammo, 1 500 ga yaqin yosh tarantulalar kontrabandasi bizni hayratda qoldirdi”, deyiladi Ahland bayonotida.
O‘rgimchaklarning ko‘pchiligi sayohatdan omon qolmagani aytilgan. Da’vo qilinishicha, hasharotlarning halok bo‘lishi Germaniya hayvonlarni himoya qilish qoidalarini buzgan. Tirik qolgan o‘rgimchaklar ekspertlarga topshirilgan.
Hasharotlardan foyda olish maqsadida kontrabanda qilish noodatiy hol emas. May oyida Keniya sudi mehmonxonada 5000 ta chumoli bilan qo‘lga tushgan ikki o‘smirga hukm chiqargandi. Unga ko‘ra, o‘smirlarga 7 700 dollar miqdorida jarima yoki 12 oylik qamoq jazosi tayinlangan.
Tarantullar (Lycosa) – o‘rgimchakbo‘rilar oilasiga mansub o‘rgimchaklar urug‘i. Tanasining uzunligi 3,5 santimetrgacha bo‘ladi. U serharakat katta va tukli o‘rgimchak bo‘lib, sizot suvlari yuza joylashgan nam tuproqli joylarda (ariq va zovurlar bo‘yi, ekin maydonlarining chekkasi, daryo bo‘ylarida) 60 santimetrgacha bo‘lgan chuqurlikda yashaydi.
Izoh (0)