Hindiston aeroportida 47 ta zaharli ilonni mamlakatga olib kirishga uringan erkak ushlandi. Bu haqda BBC xabar berdi.
Hodisa 1-iyun kuni Mumbay aeroportida sodir bo‘lgan. Erkak sudralib yuruvchilarni Tailanddan olib kelgan. Yo‘lovchining bagaji tekshirilganida 47 ta zaharli ilon va 5 ta toshbaqa aniqlangan. Ilonlar Hindistonda yovvoyi tabiatni muhofaza qilish to‘g‘risidagi qonunlarga muvofiq olib qo‘yilgan. Yo‘lovchining ismi oshkor etilmagan va u hibsda saqlanmoqda.
Bojxona xodimlari sudralib yuruvchilarning fotosuratlarini e’lon qilgan. Ularning so‘zlariga ko‘ra, yo‘lovchidan uchta o‘rgimchaksimon ilon, beshta Osiyo toshbaqasi va 44 ta Indoneziya ilonlari musodara qilingan. Erkak bu sudralib yuruvchilarni qayerdan olgani noma’lum.
Hindistonning yovvoyi tabiatni muhofaza qilish to‘g‘risidagi qonuni yo‘qolib ketish xavfi ostida bo‘lgan yoki davlat tomonidan muhofaza qilinadigan turlarni import qilishni taqiqlaydi. Yo‘lovchi har qanday yovvoyi hayvonlarni olib kirishdan oldin tegishli ruxsatnoma va litsenziyalarni olishi kerak.
Yanvar oyida Hindiston hukumati Dehli aeroportida bir kanadalikni yukida timsoh bosh suyagini olib ketayotgani uchun hibsga olgandi. Bir oy o‘tgach esa, Mumbay aeroporti xodimlari Indoneziya, Malayziya va Tailand o‘rmonlarida yashovchi beshta kichik siamang gibbonlarini olib ketayotgan yo‘lovchini to‘xtatgan.
Izoh (0)