“Сиёб” деҳқон бозори МЧЖ директори ўринбосари фуқарога бозор ҳудудидан жой ажратиб бериш эвазига 600 доллар олаётган вақтида қўлга олинди. Бу ҳақда вилоят ИИБ матбуот хизмати хабар берди.
Маълум қилинишича, 17 май куни Самарқанд шаҳрида тезкор тадбир ўтказилди. “Сиёб” деҳқон бозори МЧЖ ходими 30 ёшли фуқарога бозор ҳудудидан музқаймоқ ишлаб чиқариш аппарати жойлаштириш учун учта жой ажратиб беришини ва келгусида раҳнамолик қилишини ваъда қилган.
Бунинг эвазига ҳар бир жой учун 200 доллардан, жами 600 доллар пулни олаётганда ушланди.
Ҳолат юзасидан Жиноят кодексининг 168-моддаси 3-қисми “в” банди (фирибгарлик хизмат мавқейидан фойдаланган ҳолда) билан жиноят иши қўзғатилиб, тергов ҳаракатлари олиб борилмоқда.
Май ойида кузатилган фирибгарлик ҳолатлари
Тошкентда 2 кишини ҳажга жўнатиш учун салкам 13 минг доллар олган турфирма ходимлари ушланди. Хоразм ва Андижонда фуқароларга имтиёзли кредит олиб беришни ваъда қилиб, пул олган шахслар қўлга тушди. Тошкент шаҳар Адлия бошқармасида алоқа оператори ва Миллий гвардиянинг Қўриқлаш бошқармаси Қарши шаҳар бўлими ходимига ҳам фирибгарлик бўйича жиноят иши қўзғатилди. Қашқадарёда эса 3 нафар адвокатнинг фирибгарлиги фош этилди.
Изоҳ (0)