“O‘zbekinvest” kompaniyasi London bozorida faoliyat yurituvchi sug‘urta va qayta sug‘urta kompaniyalarining yetakchi professional birlashmalaridan biri — London xalqaro anderrayting assotsiatsiyasi (The International Underwriting Association of London, IUA) ning assotsiatsiyalangan aʼzosiga aylanib, xalqaro maydondagi ishtirokini mustahkamlash yo‘lida yana bir muhim qadam tashladi.
IUA assotsiatsiyasi xalqaro sug‘urta va qayta sug‘urta qoplamalarini taqdim etuvchi 60 dan ortiq yetakchi global sug‘urta kompaniyalarini birlashtiradi va sohadagi standartlarni shakllantirish, tashabbuslarni rivojlantirish va bilim almashishda muhim rol o‘ynaydi. IUA ga aʼzolik “O‘zbekinvest”ga dunyoda sug‘urta bozorini rivojlantirish strategiyasini shakllantiruvchi ishchi guruhlar va forumlarda ishtirok etish, shuningdek, nufuzli professional nashrlarda o‘z loyiha va tashabbuslarini taqdim etish imkonini beradi.
Shunday qilib, bugungi kunda “O‘zbekinvest” quyidagi xalqaro professional tashkilotlarning aʼzosi hisoblanadi:
IUA (International Underwriting Association of London) - London bozorining yetakchi sug‘urtalovchilari va qayta sug‘urtalovchilari uyushmasi.
Berne Union — eksport kreditlari va investitsiyalarini sug‘urtalash bo‘yicha agentliklarning xalqaro platformasi.
AMAN Union — Islom hamkorlik tashkiloti va arab mintaqasi mamlakatlari sug‘urtalovchilari va qayta sug‘urtalovchilarining professional forumi.
IIS (International Insurance Society) — sug‘urta kompaniyalari, ilmiy doiralar va tartibga soluvchilarning global birlashmasi.
FAIR (Federation of Afro-Asian Insurers and Reinsurers) — Osiyo va Afrika mamlakatlari sug‘urtalovchilarining birlashmasi bo‘lib, mintaqaviy hamkorlikka ko‘maklashadi.
“O‘zbekinvest”ning IUA ga aʼzo bo‘lishi kompaniyaning xalqaro eʼtirofga erishish, ilg‘or standartlarni joriy etish va global sug‘urta hamjamiyatida kasbiy aloqalarni faol rivojlantirish yo‘lidagi intilishini yaqqol namoyon etadi.
Reklama huquqi asosida.
Izoh (0)