Rossiyaning Kaliningrad shahrida joylashgan ko‘p qavatli uylarning biridan to‘rt nafar o‘zbekistonlikning jasadi topildi. Bu haqda Kaliningrad viloyati prokuraturasi xabar qildi.
Ma’lum qilinishicha, ularning jasadi 13-aprel kuni Gagarin ko‘chasidagi ko‘p qavatli uy xonadonida topilgan. Dastlabki xulosalarga ko‘ra, ular is gazidan zaharlanib vafot etgan. Jasadlarda zo‘ravonlik izlari kuzatilmagan.
Ehtiyotsizlik oqibatida o‘limga sabab bo‘lish moddasi bo‘yicha jinoyat ishi ochilgan bo‘lib, hozirda tergov harakatlari olib borilmoqda. Jinoyat ishi prokuratura nazoratiga olingan.
“Kaskad.tv” bergan ma’lumotlarga ko‘ra, o‘zbekistonlik fuqarolar ushbu xonadonda 1 oydan buyon ijarada yashab kelgan. Qo‘shnilar vafot etgan shaxslar haqida ijobiy fikr bildirgan, ular ko‘p ishlab, uyga kam kelishganini aytgan.
5-aprel kuni Rossiyaning Sankt Peterburg shahrida o‘zbekistonlik erkak 23-qavatdan tushib ketib, vafot etgandi. 16-aprel kuni Rossiyaning Saratov viloyatida yuz bergan YTHda bir nafar o‘zbekistonlik halok bo‘ldi, yana besh nafari jarohatlandi.
Izoh (0)