Andijon viloyatiga qo‘shimcha 1 trillion so‘m yo‘naltiriladi. Bu haqda Shavkat Mirziyoyev 16-aprel kuni viloyatni kompleks rivojlantirish bo‘yicha ustuvor vazifalar yuzasidan yig‘ilishda aytib o‘tdi.
Davlat rahbari bugungi kunda Andijonda havas qilsa arzigulik o‘zgarishlar bo‘layotganini qayd etdi. Ma’lum qilinishicha, o‘tgan yili viloyatda 4 mingdan ziyod yangi tadbirkor ish boshladi, 51 ta korxona kichikdan o‘rta toifaga o‘tdi, 13 tasi yiriklashdi. Bir yilda 450 ming aholi ishli bo‘ldi. Viloyatda 1,5 million kvadrat metr turar joy va 850 ming kvadrat metr noturar obyektlar qad ko‘tardi. Buning hisobiga o‘tgan yili savdo va xizmatlar 13 foizga, sanoat 7,5 foizga oshdi.
“Lekin hayot bir joyda to‘xtab qolmaydi. Odamlar har kuni izlanib, yangi g‘oya va tashabbuslar bilan chiqyapti, oldimizga katta-katta masalalarni qo‘ymoqda”, dedi prezident. Shuni hisobga olib, viloyatga qo‘shimcha 1 trillion so‘m yo‘naltirilishi aytildi.
Viloyat hokimligi, viloyat tashkilotlari rahbarlari, 16 ta shahar va tuman hokimlari aholi va tadbirkorlarni har kuni eshitib, hozirgi sur’atni saqlab qolishi shartligi ko‘rsatib o‘tildi. Shavkat Mirziyoyev dunyodagi bugungi iqtisodiy tebranishlar sharoitida har bir hokim favqulodda mas’uliyat olishi lozimligini aytdi.
Shavkat Mirziyoyevning Andijon viloyatiga tashrifi
Shavkat Mirziyoyev hududlar rivoji, aholi hayoti bilan yaqindan tanishish maqsadida 15-aprel kuni Andijon viloyatiga keldi. Davlat rahbari dastlab Andijon xalqaro aeroportini modernizatsiyalash ishlarining borishi bilan tanishdi. WBM Romitex klasterining Andijon shahrida qurilgan yangi korxonasiga borib, faoliyatini ko‘zdan kechirdi. Tashrif davomida yangi korxonalar faoliyatidan tashqari, sanoat, energetika, shaharsozlik va boshqa sohalarda amalga oshirilayotgan ishlar bilan tanishdi, joylardagi qurilish va bunyodkorlikni ko‘zdan kechirdi. Tashrif davomida Andijondagi “Yangi O‘zbekiston” bog‘idagi xalq saylida ishtirok etdi.
Izoh (0)