Андижон вилоятига қўшимча 1 триллион сўм йўналтирилади. Бу ҳақда Шавкат Мирзиёев 16 апрель куни вилоятни комплекс ривожлантириш бўйича устувор вазифалар юзасидан йиғилишда айтиб ўтди.
Давлат раҳбари бугунги кунда Андижонда ҳавас қилса арзигулик ўзгаришлар бўлаётганини қайд этди. Маълум қилинишича, ўтган йили вилоятда 4 мингдан зиёд янги тадбиркор иш бошлади, 51 та корхона кичикдан ўрта тоифага ўтди, 13 таси йириклашди. Бир йилда 450 минг аҳоли ишли бўлди. Вилоятда 1,5 миллион квадрат метр турар жой ва 850 минг квадрат метр нотурар объектлар қад кўтарди. Бунинг ҳисобига ўтган йили савдо ва хизматлар 13 фоизга, саноат 7,5 фоизга ошди.
“Лекин ҳаёт бир жойда тўхтаб қолмайди. Одамлар ҳар куни изланиб, янги ғоя ва ташаббуслар билан чиқяпти, олдимизга катта-катта масалаларни қўймоқда”, деди президент. Шуни ҳисобга олиб, вилоятга қўшимча 1 триллион сўм йўналтирилиши айтилди.
Вилоят ҳокимлиги, вилоят ташкилотлари раҳбарлари, 16 та шаҳар ва туман ҳокимлари аҳоли ва тадбиркорларни ҳар куни эшитиб, ҳозирги суръатни сақлаб қолиши шартлиги кўрсатиб ўтилди. Шавкат Мирзиёев дунёдаги бугунги иқтисодий тебранишлар шароитида ҳар бир ҳоким фавқулодда масъулият олиши лозимлигини айтди.
Шавкат Мирзиёевнинг Андижон вилоятига ташрифи
Шавкат Мирзиёев ҳудудлар ривожи, аҳоли ҳаёти билан яқиндан танишиш мақсадида 15 апрель куни Андижон вилоятига келди. Давлат раҳбари дастлаб Андижон халқаро аэропортини модернизациялаш ишларининг бориши билан танишди. WБМ Ромитех кластерининг Андижон шаҳрида қурилган янги корхонасига бориб, фаолиятини кўздан кечирди. Ташриф давомида янги корхоналар фаолиятидан ташқари, саноат, энергетика, шаҳарсозлик ва бошқа соҳаларда амалга оширилаётган ишлар билан танишди, жойлардаги қурилиш ва бунёдкорликни кўздан кечирди. Ташриф давомида Андижондаги “Янги Ўзбекистон” боғидаги халқ сайлида иштирок этди.
Изоҳ (0)