Ukraina Bosh qo‘mondoni Aleksandr Sirskiy Rossiya Aerokosmik kuchlarining Tu-22M3 uzoq masofali bombardimonchi samolyoti safdan chiqarilganini ma'lum qildi. Mahalliy LB.ua nashriga intervyu bergan qo‘mondon samolyot dron zarbasi yordamida yo‘q qilinganini ta'kidlagan.
“Biroz avval bizning dronlarimiz Tu-22M3 bombardimonchi samolyotiga yerga qo‘ngan zahoti zarba berdi”, dedi Sirskiy.
Ukraina harbiy manbalariga ko‘ra, mazkur voqea 31-martga o‘tar kechasi Rossiyaning strategik bombardimonchi samolyotlar joylashgan aviabazasiga hujum vaqti sodir bo‘lgan.
Tahlilchilari sun’iy yo‘ldosh tasvirlarini o‘rganib, bazadagi maxsus binolardan biri — X-22 va X-32 qanotli raketalarini uchirishga tayyorlash uchun ishlatiladigan inshoot jiddiy zarar ko‘rganini aniqladi. Aynan shu binoda raketalarga yoqilg‘i quyish va nishonga yo‘naltirish tizimlari sozlanadi.
Tu-22M3 Sovet Ittifoqi tomonidan ishlab chiqilgan strategik bombardimonchi bo‘lib, har biri 100 million dollarga baholanadi. U qanotli raketalar, boshqariluvchi bombalar va hatto yadroviy qurollar bilan zarba berishi mumkin. Ular Ukrainaga qarshi faol qo‘llaniladi.
Sirskiy zarba qachon va qayerga berilganini oshkor qilmagan. Moskva esa, o‘z navbatida, mazkur iddaoni na tasdiqladi, na inkor qildi.
Biroq Rossiya tomoni 2-aprel kuni bayonot chiqarib, Tu-22M3 samolyotlaridan biri texnik nosozlik sabab qulab tushgani, hodisa natijasida uchuvchilardan biri halok bo‘lgani, qolgan to‘rt nafari esa katapulta mexanizmi yordamida samolyotni tark etganini ma’lum qilgandi. E’tiborlisi, o‘shanda halokat joyi sifatida Ukraina bilan chegaradan qariyb 4 ming kilometr uzoqlikdagi Irkutsk viloyati keltirilgan.
Ukraina qurolli kuchlari Bosh shtabining 9-aprel kungi hisobotiga ko‘ra, Rossiya tomoni keng ko‘lamli urush boshidan buyon 370 ta harbiy samolyotdan ayrilgan.
Izoh (0)