Украина Бош қўмондони Александр Сирский Россия Аэрокосмик кучларининг Ту-22М3 узоқ масофали бомбардимончи самолёти сафдан чиқарилганини маълум қилди. Маҳаллий LB.ua нашрига интервью берган қўмондон самолёт дрон зарбаси ёрдамида йўқ қилинганини таъкидлаган.
“Бир оз аввал бизнинг дронларимиз Ту-22М3 бомбардимончи самолётига ерга қўнган заҳоти зарба берди”, деди Сирский.
Украина ҳарбий манбаларига кўра, мазкур воқеа 31 мартга ўтар кечаси Россиянинг стратегик бомбардимончи самолётлар жойлашган авиабазасига ҳужум вақти содир бўлган.
Таҳлилчилари сунъий йўлдош тасвирларини ўрганиб, базадаги махсус бинолардан бири — Х-22 ва Х-32 қанотли ракеталарини учиришга тайёрлаш учун ишлатиладиган иншоот жиддий зарар кўрганини аниқлади. Айнан шу бинода ракеталарга ёқилғи қуйиш ва нишонга йўналтириш тизимлари созланади.
Ту-22М3 Совет Иттифоқи томонидан ишлаб чиқилган стратегик бомбардимончи бўлиб, ҳар бири 100 миллион долларга баҳоланади. У қанотли ракеталар, бошқарилувчи бомбалар ва ҳатто ядровий қуроллар билан зарба бериши мумкин. Улар Украинага қарши фаол қўлланилади.
Сирский зарба қачон ва қаерга берилганини ошкор қилмаган. Москва эса, ўз навбатида, мазкур иддаони на тасдиқлади, на инкор қилди.
Бироқ Россия томони 2 апрель куни баёнот чиқариб, Ту-22М3 самолётларидан бири техник носозлик сабаб қулаб тушгани, ҳодиса натижасида учувчилардан бири ҳалок бўлгани, қолган тўрт нафари эса катапульта механизми ёрдамида самолётни тарк этганини маълум қилганди. Эътиборлиси, ўшанда ҳалокат жойи сифатида Украина билан чегарадан қарийб 4 минг километр узоқликдаги Иркуцк вилояти келтирилган.
Украина қуролли кучлари Бош штабининг 9 апрель кунги ҳисоботига кўра, Россия томони кенг кўламли уруш бошидан буён 370 та ҳарбий самолётдан айрилган.
Изоҳ (0)