Xususiylashtirilgan “Kvarts” AJdagi 89,7 foiz aksiyalar paketi davlatga qaytariladi. Bu haqda Davlat aktivlarini boshqarish agentligi xabar berdi.
2023-yilning fevral oyida “Kvarts” kompaniyasining qariyb 90 foiz ulushi “Quvasoysement”ga 265 mlrd so‘mga sotilgan edi. Davaktivning xabariga ko‘ra, “Kvarts”ning faoliyati monitoring qilib borilgan va to‘lov grafiklardagi uzilishlarni oldini olish maqsadida “Quvasoysement” AJ ogohlantirib kelingan.
“Quvasoysement”ning shartnomaviy majburiyatlarini bajarishdagi qiyinchiliklari tufayli, AJ boshqaruv organlarining qaroriga asosan oldi-sotdi shartnomani taraflarning o‘zaro kelishuviga ko‘ra bekor qilish bo‘yicha Davaktivga murojaati kelib tushgan.
Shunga ko‘ra, “Quvasoysement”ning tashabbusini inobatga olib, oldi-sotdi shartnomasi tomonlarning 2025-yil 14-fevraldagi o‘zaro kelishuviga asosan bekor qilingan. Shu munosabat bilan “Kvarts”ning kuzatuv kengashi tarkibi qayta ko‘rib chiqilib, unga Davaktiv agentligi vakillari kiritilgan.
Taʼkidlash joizki, jamiyatning 89,78 foiz aksiyalar paketini davlat ixtiyoriga qaytarilishi oldi-sotdi shartnomasi shartlari to‘liq bajarilmaganligi natijasida yuz bergan va shartnomaviy-huquqiy munosabatlar doirasida amalga oshirilgan bo‘lib, ushbu holat xususiylashtirish natijalarini qayta ko‘rib chiqish yoxud milliylashtirish hisoblanmaydi.
Shu bilan birga, bugungi kunda, “Kvarts”ni moliyaviy sog‘lomlashtirish bo‘yicha “yo‘l xaritasi” tasdiqlanib, tegishli chora-tadbirlar amalga oshirilmoqda.
“Kvarts” 1975-yilda ishga tushirilgan. Ushbu korxona O‘zbekiston va butun Markaziy Osiyoda shisha idishlar, avtomobil sanoati uchun shishalar, shuningdek, o‘tga chidamli g‘isht, butilkalar, varaqli sayqallangan, rangli (yashil, kulrang va bronza) va toblangan shisha ishlab chiqarish bo‘yicha eng yirik korxona hisoblanadi.
Izoh (0)