Namangan viloyatida qarindoshlarining plastik kartasi orqali pora olgan bojxona inspektoriga jinoyat ishi qo‘zg‘atildi.
Keltirilishicha, holat Korrupsiyaga qarshi kurashish yo‘nalishida Davlat xavfsizlik xizmati xodimlari tomonidan olib borilgan tezkor-qidiruv tadbirlari davomida aniqlangan.
Namangan viloyati bojxona boshqarmasi “Uchqo‘rg‘on” chegara bojxona postining bojxona nazorati va rasmiylashtiruv guruhi inspektori fuqaroning xorijdan olib kelingan 57 dona iPhone 16 Pro Max telefon qurilmalarini Toshkent xalqaro aeroportida ishlovchi bojxona xodimi orqali IMEI-kodi bo‘yicha ro‘yxatdan o‘tkazib berish evaziga har bir uyali aloqa vositasi uchun 100 AQSH dollaridan, jami 5700 AQSH dollari so‘ragan.
Bundan tashqari, u muqaddam fuqaro chet eldan deklaratsiyada ko‘rsatmagan holda kiyim-kechaklarni olib kelgani yuzasidan chora ko‘rmagani evaziga 400 AQSH dollari talab qiladi.
Inspektor joriy yilning 11 va 14-iyul kunlari so‘ralgan pul mablag‘idan 900 AQSH dollari hisobida 11 mln 317 ming so‘mni o‘zi va qarindoshiga tegishli bank plastik kartalariga o‘tkazdirib oladi.
Ammo 16-iyul kuni u 1000 AQSH dollari hisobida 12 mln 550 ming so‘mni qarindoshining bank plastik kartasiga o‘tkazdirib olgan vaqtida DXX, Bosh prokuratura huzuridagi departament hamda Bojxona qo‘mitasi xodimlari tomonidan ashyoviy dalillar bilan ushlandi.
Holat yuzasidan bojxona inspektoriga nisbatan Jinoyat kodeksining 168-moddasi 3-qismi “v” bandi va 28,211-moddasi 1-qismi bilan jinoyat ishi qo‘zg‘atilib, qamoq ehtiyot chorasi qo‘llandi. Tergov harakatlari olib borilmoqda.
9-iyul kuni Sharof Rashidov tumani hokimi va Guliston shahar prokurori o‘rinbosari pora olayotganda ushlangani xabar qilingandi. 12-iyulda esa Toshkent va Farg‘onada universitetlar kafedra o‘qituvchilari pora bilan qo‘lga olingan. Mazkur hodisaga oliy ta’lim, fan va innovatsiyalar vaziri Qo‘ng‘irotboy Sharipov munosabat bildirib, bu mutlaqo kechirilmas va keskin qoralovga loyiq harakatlar ekanini, bunday noqonuniy urinishlar butun oliy ta’lim tizimiga dog‘ tushirishini aytgan.
Izoh (0)