Хусусийлаштирилган “Кварц” АЖдаги 89,7 фоиз акциялар пакети давлатга қайтарилади. Бу ҳақда Давлат активларини бошқариш агентлиги хабар берди.
2023 йилнинг февраль ойида “Кварц” компаниясининг қарийб 90 фоиз улуши “Қувасойцемент”га 265 млрд сўмга сотилган эди. Давактивнинг хабарига кўра, “Кварц”нинг фаолияти мониторинг қилиб борилган ва тўлов графиклардаги узилишларни олдини олиш мақсадида “Қувасойцемент” АЖ огоҳлантириб келинган.
“Қувасойцемент”нинг шартномавий мажбуриятларини бажаришдаги қийинчиликлари туфайли, АЖ бошқарув органларининг қарорига асосан олди-сотди шартномани тарафларнинг ўзаро келишувига кўра бекор қилиш бўйича Давактивга мурожаати келиб тушган.
Шунга кўра, “Қувасойцемент”нинг ташаббусини инобатга олиб, олди-сотди шартномаси томонларнинг 2025 йил 14 февралдаги ўзаро келишувига асосан бекор қилинган. Шу муносабат билан “Кварц”нинг кузатув кенгаши таркиби қайта кўриб чиқилиб, унга Давактив агентлиги вакиллари киритилган.
Таъкидлаш жоизки, жамиятнинг 89,78 фоиз акциялар пакетини давлат ихтиёрига қайтарилиши олди-сотди шартномаси шартлари тўлиқ бажарилмаганлиги натижасида юз берган ва шартномавий-ҳуқуқий муносабатлар доирасида амалга оширилган бўлиб, ушбу ҳолат хусусийлаштириш натижаларини қайта кўриб чиқиш ёхуд миллийлаштириш ҳисобланмайди.
Шу билан бирга, бугунги кунда, “Кварц”ни молиявий соғломлаштириш бўйича “йўл харитаси” тасдиқланиб, тегишли чора-тадбирлар амалга оширилмоқда.
“Кварц” 1975 йилда ишга туширилган. Ушбу корхона Ўзбекистон ва бутун Марказий Осиёда шиша идишлар, автомобиль саноати учун шишалар, шунингдек, ўтга чидамли ғишт, бутилкалар, варақли сайқалланган, рангли (яшил, кулранг ва бронза) ва тобланган шиша ишлаб чиқариш бўйича энг йирик корхона ҳисобланади.
Изоҳ (0)