Pokistonning Panjob provinsiyasida 16-iyul kuni shiddatli musson yomg‘irlari boshlandi. Mamlakatda tabiiy ofat sabab so‘nggi 24 soat ichida 63 kishi halok bo‘lib, 290 kishi jarohatlandi. Bu haqda BBC xabar berdi.
Tabiiy ofatlarni boshqarish milliy boshqarmasiga ko‘ra, qurbonlarning aksariyatini binolar bosib qolgan. Qolganlari esa cho‘kib ketgan yoki elektr toki urishi oqibatida halok bo‘lgan. Ravalpindi shahri rasmiylari 17-iyul kunini barchaga dam olish kuni deb e’lon qilgan. Shahar ichidan oqib o‘tuvchi daryo yaqinida yashovchilar esa evakuatsiya qilingan.
Suv toshqinlari Panjob provinsiyasi bo‘ylab bir nechta tezyurar yo‘llarni yopib qo‘ygan. O‘nlab samolyot reyslari bekor qilingan yoki kechiktirilgan. Provinsiya hokimi Maryam Navoz 17-iyul kuni bir qator hududlarda favqulodda holat e’lon qilgan.
“Hukumat muassasalari bor kuch-g‘ayrati bilan ishlamoqda. Aholini xavfsizlik qoidalariga qat’iy rioya qilishga chaqiraman”, degan u.
Chakval shahrida o‘tgan 24 soat ichida 400 millimetr yomg‘ir yog‘gan. Odamlarni evakuatsiya qilish uchun qutqaruv qayiqlari safarbar qilingan. Kuchli suv bosgan hududlardan aholi vertolyotlar yordamida qutqarilmoqda. Panjob hukumati bu hafta yana yomg‘ir yog‘ishi va sel davom etishi haqida ma’lumot bergan.
Iyun oyida boshlangan musson sabab shu kungacha halok bo‘lganlarning umumiy soni 180 nafarga yetgan. Ularning yarmidan ko‘pi bolalar.
250 millionga yaqin aholiga ega Pokistonda tabiiy ofatlar tez-tez sodir bo‘ladi. Mamlakatga 2022-yili yopirilgan musson suv toshqinlari hududning uchdan bir qismini suv ostida qoldirgan va 1700 kishini hayotdan olib ketgan. Hodisa mahalliy iqtisodiyotga 30 milliard dollardan ortiq zarar keltirgani ma’lum qilingan.
Izoh (0)