Rejissyor Jeyms Gann tomonidan suratga olingan yangi “Supermen” filmidagi Kripto laqabli sodiq it nafaqat filmda, balki haqiqiy real hayotda ham ko‘plab insonlarga ilhom manbai bo‘ldi. Film ekranlarga chiqishi bilan dunyoning turli burchaklarida tomoshabinlar boshpanasiz va qarovsiz qolgan itlarni qaramog‘iga ola boshladi.
Foto: PeopleTalk
Itlar haqida turli ma’lumotlarni o‘zida jamlagan Woofz ilovasi statistikasiga ko‘ra, film premyerasidan keyingi ilk kunlardanoq “yaqin atrofdan it boqib olish” kabi so‘rovlar soni 500 foizga oshgan. Maxsus qutqaruvchi itlarni izlash bo‘yicha ko‘rsatkich ham 163 foizga ortgan. Tomoshabinlar Kripto obrazidan shunchalik ilhom olishdiki, uning qiyofasiga o‘xshagan — shnauzer zotli itlarni topish bo‘yicha ko‘plab so‘rovlar yuborgan.
Ssenariy ustida ishlayotgan paytda Gann o‘zining Odzu ismli boshpanadan olib kelingan kuchugini tarbiyalashda qiyinchiliklarga duch kelgan. Shu holat unda savol tug‘dirgan: “Agar itda superqobiliyatlar bo‘lsa, nima bo‘lardi?” Shu tarzda sodiq, lekin biroz itoatsiz it — Kripto obrazi filmda paydo bo‘lgan.
Tomoshabinlarning mehribon kayfiyatidan ruhlanib, Warner Bros. kinokompaniyasi Best Friends Animal Society tashkiloti bilan hamkorlikda AQSHda 1–10-iyul kunlari hayvonlarni asrab olish xarajatlarini to‘lab berdi. Shu davrda 454 ta hayvon yangi uyga ega bo‘ldi. Ijtimoiy tarmoqlarda itlarni asrab olgan insonlar va ularning quvnoq uchrashuvlarini aks ettirgan videolar keng tarqaldi.
Bundan avval ham aynan rejissyor Gann filmidan so‘ng insonlarning hayvonlarga munosabati ijobiy tomonga o‘zgargan. Uning 2023-yilda suratga olingan “Galaktika qo‘riqchilari 3” filmi hayvonlarga nisbatan shafqatsizlik mavzusini ko‘tarib chiqqani uchun PETA tashkiloti tomonidan e’tirof etilgan. Endilikda “Supermen” ham insonlarni ezgu ishlarga undayotgan filmga aylandi. Bu esa kino san’ati jamiyatda ijobiy o‘zgarishlar qilishga qodir ekanini yana bir bor ko‘rsatmoqda.
Izoh (0)