O‘zbekiston xalq shoiri Xurshid Davron “Daryo” muxbiri bilan suhbatda Islom Karimov davrida sanʼatkorlarning qanday qilib televideniyada taqiqqa tushib qolishi haqida so‘zlab berdi.
— Islom Karimov ochiq gapirgan odamni yoqtirardi. Bir gapni boshlasangiz, oxirigacha aytishingizni talab qilar, chala gapirishga yo‘l qo‘ymasdi. Mana shu sababdan “saroy ahli”ning 90 foizi “falon gapni aytsam, savolga tuta boshlasa, javob bera olamanmi, yo‘qmi, yaxshisi aytmay qo‘ya qolay” deya hadiksirab turardi. Bunday holatlarga ko‘p guvoh bo‘lganman. Men hatto baʼzi mavzularda gapira boshlasam, “aytma-aytma”, deb biqinimga turtishardi.
Islom Karimov haqida o‘z xotiralarimni so‘zlasam, latifaga ham o‘xshab ketadi. Televideniyada masʼul lavozimlarda ishlagan vaqtimda “falonchi chiqarilmasin, pismadonchi ekranlarda ko‘rsatilmasin” degan topshiriqlar kelib qolardi. Masalan, “Zamira Suyunova chiqarilmasin” deyilardi. Sababini hech kim bilmaydi. Bilganlar aytmaydi. Vaziyatni tasavvur qiling... Keyin maʼlum bo‘lishicha, Islom Karimov televizor ko‘rib o‘tirganda, “Dutorchi qizlar” ansamblining konserti namoyish etiladi. Karimov uni ko‘rib, “Iya, bu qizlar hali ham bormi? Ularni qo‘llab-quvvatlash kerak, yaxshi liboslar olib beringlar, sifatli sozlar sovg‘a qilinglar” deya topshiriq beradi. Ana shu topshiriqni olgan amaldor darrov “Zamira Suyunova ekranlarda ko‘rsatilmasin” deya zimdan shipshitib qo‘yadi. Nima uchun? Negaki Islom Karimov xonandani yana televizorda ko‘rib qolsa, “Men aytgan topshiriq bajarildimi?” deb so‘rab qolishi mumkin edi-da. Haligilar shu gapdan qo‘rqishgan.
Bu bittagina misol. Nima uchun Begali Qosimov chiqarilmadi, Botir Zokirov, Sherali Jo‘rayev nega ko‘rsatilmadi?... Ayrimlar bilib-bilmay gapiraveradi. Bunday “topshiriqlar”ning ortida ko‘pincha Islom Karimovning nomidan gapirgan odamlar turgan. Yuz foizdan 20-25 foizi Karimovning o‘zidan chiqqan bo‘lishi mumkin, xolos.
Suhbatning to‘liq shaklini YouTubeʼdagi sahifamizda tomosha qilishingiz mumkin.
Izoh (0)