O‘zbekistonda 2025-yilda nogironligi bo‘lgan bolalarga ijtimoiy soha obyektlari, ta’lim muassasalariga borib kelishlariga qulayliklar yaratish maqsadida ijtimoiy transport xizmati yo‘lga qo‘yiladi. Bu haqda Ijtimoiy himoya milliy agentligi axborot xizmati xabar berdi.
Ma’lum qilinishicha, Vazirlar Mahkamasining “Transport xizmatlaridan foydalanish imkoniyatlarini kengaytirish orqali ko‘rish va harakatlanish bilan bog‘liq kasalliklarga chalingan alohida ta’lim ehtiyojlari bo‘lgan bolalar uchun ta’lim olish sharoitlarini yaxshilash to‘g‘risida”gi 132-sonli qarori qabul qilindi.
Qaror bilan, ushbu xizmatni 2025-yil 1-apreldan Toshkent, Andijon va Samarqand shaharlarida pilot loyiha sifatida, 2025-yilning yakuniga qadar esa respublikaning boshqa hududlarida bosqichma-bosqich joriy etish belgilandi.
Loyiha doirasida transport xizmatlari:
- ixtisoslashtirilgan maktab, maktab-internatlari, shu jumladan, ushbu muassasalardagi “G‘amxo‘rlik” guruhlarida,
- umumta’lim maktablarining inklyuziv sinflarida;
- reabilitatsiya markaziga ega davlat ko‘p tarmoqli ixtisoslashtirilgan maktabgacha ta’lim tashkilotlarida ta’lim oluvchi ko‘rish va harakatlanish bilan bog‘liq kasalliklarga chalingan bolalarga ko‘rsatiladi.
Xizmatdan foydalanganlik uchun to‘lov va subsidiya tizimi ham joriy etilmoqda. Xususan:
- har bir yo‘lovchiga bir oyda bazaviy hisoblash miqdorining 1,2 baravaridan oshmaydigan miqdorda;
- Ijtimoiy himoya yagona reyestri yoki Kam ta’minlangan oilalar reyestriga kiritilgan oilalardagi yo‘lovchilar uchun har bir qatnov to‘lovining 100 foizi;
- yuqorida ko‘rsatilgan reyestrlarga kiritilmagan oilalardagi yo‘lovchilar uchun har bir qatnov to‘lovining 60 foizi subsidiya shaklida qoplanadi.
Subsidiya shaklidagi to‘lovlarni agentlikning Ijtimoiy himoya davlat jamg‘armasi mablag‘lari hisobidan amalga oshiriladi.
Loyiha doirasida xizmat tadbirkorlik subyektlari tomonidan ko‘rsatiladi. Tadbirkorlik subyektlari uchun agentlik tomonidan “Yagona milliy ijtimoiy himoya” AT da elektron shaklda yuritiladigan Transport xizmatini ko‘rsatuvchi tadbirkorlik subyektlari reyestri shakllantiriladi. Transport xizmatidan foydalanish bo‘yicha buyurtmalar reyestrdagi tadbirkorlik subyektlarining mobil ilovalari orqali beriladi. Transport xizmatining o‘z vaqtida va sifatli ko‘rsatilishini agentlik huzuridagi “Axborot texnologiyalari markazi” Call-markazi tomonidan monitoring qilinadi.
Shuningdek, mazkur qaror bilan tasdiqlangan nizomga muvofiq yo‘lovchilarni ijtimoiy ahamiyatga ega transport xizmatidan foydalanuvchilar ro‘yxatiga kiritish bo‘yicha murojaat qilishning Yagona interaktiv davlat xizmatlari portali orqali joriy etiladi va ushbu murojaatlarni ko‘rib chiqilishining tashkiliy-boshqaruv imkoniyatini yaratiladi.
Agentlik “Ijtimoiy taksi” pilot loyihasi amalga oshirilishi haqida 2024-yilning mart oyida ma’lum qilgandi. 2024-yilning noyabrida nogironligi bo‘lgan shaxslar uchun “Ijtimoiy taksi” pilot loyihasi Toshkent shahrida ishga tushgandi.
“Nogironligi bo‘lgan bolalarga ijtimoiy xizmat va yordam ko‘rsatish tizimini yanada takomillashtirish bo‘yicha qo‘shimcha chora-tadbirlar to‘g‘risida”gi prezident qaroriga ko‘ra, 2025-yil 1-martdan tajriba-sinov tariqasida bosqichma-bosqich Qoraqalpog‘iston Respublikasi, Andijon, Qashqadaryo, Samarqand, Surxondaryo va Toshkent viloyatlari hamda Toshkent shahrida, 2025-yil 1-oktyabrgacha respublikaning qolgan hududlarida 3 yoshdan 18 yoshgacha nogironligi bo‘lgan bolalar uchun davlat-xususiy sheriklik asosida kunduzgi parvarish xizmati yo‘lga qo‘yiladi.
“Nogironligi bo‘lgan shaxslarga qulay va to‘siqlarsiz muhit yaratish bo‘yicha qo‘shimcha chora-tadbirlar to‘g‘risida”gi prezident qaroriga ko‘ra 2026-yil 1-yanvargacha nogironligi bo‘lgan shaxslarning harakatlanishi uchun respublikaning barcha hududlarini qamrab oluvchi to‘siqlarsiz muhit yaratilgan obyektlarni aniqlash imkonini beruvchi “Interaktiv xarita” axborot tizimi ishga tushiriladi.
Izoh (0)