Futbol bo‘yicha Italiya chempionatining 26-turidan o‘rin olgan so‘nggi bahsda “Roma” o‘z maydonida autsayder “Monsa”ni qabul qilib, yirik hisobda g‘alaba qozondi.
Mezbonlar raqib darvozasiga javobsiz 4 ta to‘p kiritdi. Rimliklar safida maydonga tushgan O‘zbekiston milliy jamoasi sardori Eldor Shomurodov 70 daqiqa harakat qilib, 1 ta gol urdi va yana bir golga hammualliflik qildi.
Uchrashuvning 10-daqiqasida Salemakers Eldorning pasidan keyin zarba berib hisobni ochdi. 32-daqiqada Saulening uzatmasini Shomurodov bosh bilan zarba yo‘llab golga aylantirdi.
Sofascore nashri o‘zbekistonlik futbolchining harakatlarini 8,1 ballga loyiq ko‘rdi. Shomurodovning goliga assistlik qilga Soule 8,6 bilan baholandi. Gol+assist qayd etgan yana bir futbolchi Kristantega nashri o‘yindagi eng yuqori ballni qo‘ydi — 9,1 ball. Jamoa sardori Manchini jamoa tarkibida eng past 6,9 ball olgan.
Brorsson “Monsa” tarkibida 7 ballga loyiq ko‘rilgan yagona futbolchi. Mehmonlar tarkibida jarohat olib 76-daqiqada almashtirilgan Karboni 5,9 ball bilan baholangan.
Ushbu g‘alabadan so‘ng, Rim klubi ochkolari sonini 40 taga yetkazib, 9-o‘rinni egallab turibdi. “Monsa” 14 ochko bilan 20-pog‘onada qoldi. “Roma” keyingi uchrashuvni yakshanba, 2-mart kuni “Komo”ga qarshi o‘tkazadi.
Izoh (0)