Hindistonning Uttar-Pradesh shtati Greater Noida shahrida 28 yoshli ayol Nikki Payla 6 yoshli o‘g‘lining ko‘z o‘ngida o‘z eri tomonidan tiriklayin yoqib yuborildi. Bu haqda The Independent xabar berdi.
Ma’lum bo‘lishicha, marhumaning eri va qaynata-qaynanasi ayoldan uzluksiz ravishda qimmatbaho sovg‘alar talab qilib kelgan. Natija bo‘lmagach, Nikki Payla 21-avgust kuni eri Vipin Bhati tomonidan tez yonuvchan bo‘yoq suyultirgich yordamida tiriklayin yoqib yuborilgan. Paylaning oilasi politsiyaga bergan arizada kuyov tomoni 3,5 million rupiy (taxminan 500 million so‘m) va qimmatbaho avtomobil talab qilganini bildirgan.
Politsiya ma’lumotlariga ko‘ra, asosiy gumonlanuvchi – Vipin Bhati 24-avgust kuni hibsga olingan. Erkak qochishga uringanda politsiya uni oyog‘idan otib, qo‘lga olgan. Erkak tergovda qilmishidan afsusda emasligini bildirgan.
“Men afsuslanayotganim yo‘q. Men uni o‘ldirmaganman. U o‘zi vafot etdi. Er-xotin orasida tortishuv bo‘lishi odatiy hol”, degan u.
Shuningdek, erkakning onasi ham hibsga olingan — u Nikki Paylaga doimiy ruhiy va jismoniy zo‘ravonlik ko‘rsatganlikda ayblanmoqda. Politsiya 25-avgust kuni tergov doirasini kengaytirib, Bhati oilasining yana ikki a’zosini — Vipinning otasi Satya Vir (55 yosh) va ukasi Rohit Bhati (28 yosh)ni qo‘lga olgan.
Voqea haqida ilk ma’lumotlar Kasna politsiyasiga Fortis xususiy shifoxonasidan kelib tushgan. U yerda marhuma og‘ir kuyish tan jarohatlari bilan qabul qilingan va keyinchalik uni Dehlidagi Safdarjung shifoxonasiga yuborilgan. Afsuski, Nikki yo‘lda vafot etgan.
Tergovga ko‘ra, ayol kuchli yonuvchi modda bilan yoqib yuborilgan. Politsiya hozirda bu ishni har tomonlama o‘rganmoqda. Nikki Paylaning opasi Kanchan (u ham Bhati oilasiga kelin bo‘lgan) marhuma ko‘rgan zo‘ravonliklar aks etgan videolarni ijtimoiy tarmoqlarda tarqatgan. Bu videolar ham ishga dalil sifatida qo‘shilgan.
“Opasi bizga ariza bilan murojaat qilib, kuyov va uning oilasini javobgarlikka tortishni so‘radi. Biz darhol jinoyat ishi ochdik”, dedi politsiya xodimi Dharmendra Shukla.
Payla oilasining aytishicha, Nikki va opasi 2016-yildagi to‘ylaridan buyon sep undirish maqsadida qiynoqqa solib kelingan. Ular avvalroq Bhati oilasiga Scorpio rusumli avtomobil, Royal Enfield mototsikli va tilla taqinchoqlar hadya qilgan.
Statistikaga ko‘ra, 2017/22-yillar oralig‘ida har yili o‘rtacha 7000 ta o‘lim holati qayd etilib, ularning barchasida sep mojarosi asosiy mavzu bo‘lgan. Ammo haqiqiy raqamlar bundan ham yuqori bo‘lishi mumkin, chunki ko‘plab holatlar rasmiy organlarga yetib bormaydi.
Izoh (0)