Islomobodda Germaniya elchixonasi xodimi o‘lik holda topildi, u diplomat emas, rasmiy ravishda Federal razvedka xizmatida ishlagan. Bu haqda Bild xabar berdi.
Ma’lum qilinishicha, 54 yoshli Tomas B. ikki kun davomida ish joyida ko‘rinmagan va qo‘ng‘iroqlarga javob bermagan. Uning hamkasblari jasadni Pokiston poytaxtining qo‘riqlanadigan diplomatik hududida joylashgan xonadondan topgan.
Oxirgi marta nemis diplomati 11-yanvar kuni kechqurun WhatsApp’ga kirgan. Pokiston huquq-tartibot idoralari ma’lumotiga ko‘ra, Tomas B. yurak bilan bog‘liq muammolar tufayli davolangan. Bu uning o‘limi bilan bog‘liq bo‘lishi mumkin.
Shu bilan birga, ijtimoiy tarmoqlarda marhumning yuzidagi qon aks etgan fotosuratlar paydo bo‘lgan. Pokiston politsiyasi qon ketishi o‘limdan keyin boshlanganini aytmoqda. O‘lim sababi hozircha noma’lum.
Tomas B. Pokistonda uch yarim yil ishlagan va inqirozli hududlar bo‘yicha tajribali mutaxassis hisoblangan. Germaniya Tashqi ishlar vazirligining bayonotida uning o‘limi tasdiqlangan. Federal razvedka xizmati bu holatga izoh berishdan bosh tortgan.
Pokistonda ishlash yuqori xavf darajasi bilan bog‘liq: xususan, Islomobod Germaniya Tashqi ishlar vazirligining tahdidlarni baholash tizimida yuqori reytingga ega.
Izoh (0)