Xitoyda odamlar robotlar bilan raqobatlashadigan dunyodagi ilk yugurish marafonini o‘tkazish rejalashtirilmoqda. Bu haqda South China Morning Post xabar berdi.
Marafon aprel oyida Pekinning Dasin rayonida bo‘lib o‘tishi kutilmoqda. Unda dunyo bo‘ylab kompaniyalar tomonidan ishlab chiqilgan odamsimon robotlar 12 000 nafar insonlar bilan yuguradi.
“Bu misli ko‘rilmagan musobaqalar Xitoyning sun’iy intellekt va robototexnika sohasida jahon yetakchisiga aylanishga bo‘lgan ulkan intilishini aks ettiradi”, deb yozadi Interesting Engineering.
Poyga 21 kilometrlik masofani qamrab oladi. Eng yaxshi uch nafar ishtirokchiga sovrinlar topshiriladi.
“Pekin iqtisodiy-texnologik taraqqiyot rayoni tomonidan taqdim etilgan shartlarga ko‘ra, butun dunyodagi kompaniyalar, ilmiy-tadqiqot institutlari, robototexnika klublari va universitetlar marafonda o‘z robotlari bilan ishtirok etadi”, deyiladi xabarda.
Ishlab chiquvchilarga qo‘yiladigan asosiy talab robotlar inson qiyofasiga maksimal darajada o‘xshash bo‘lishi kerak. Ular ikki oyoqda yurish yoki yugurish imkonini beradigan mexanik tuzilma bilan jihozlangan bo‘lishi lozim. Robotlarning bo‘yi 0,5 dan 2 metrgacha bo‘lishi kerak.
Musobaqada masofadan boshqariladigan hamda to‘liq avtonom robotlar ishtirok etishiga ruxsat beriladi, poyga davomida ularning batareyalarini almashtirish mumkin.
Izoh (0)