AQSH prezidenti lavozimiga kirishgan Donald Tramp Vashingtondagi Capital One stadionida tarafdorlar oldida so‘zga chiqib, dastlabki to‘qqizta farmonni imzoladi. Translyatsiyani ABC YouTube’da olib boradi.
Birinchi imzolangan farmonlar Jo Bayden davrida qabul qilingan 78 ta qarorni bekor qilish, shuningdek, AQSHning Parij bitimidan chiqishni ham o‘z ichiga oladi. Donald Trampning dastlabki farmoyishlari qatorida quyidagilar ham bor:
- Federal hukumat ustidan “to‘liq nazorat o‘rnatilgunga qadar” amaldorlar tomonidan yangi me’yoriy hujjatlar qabul qilinishini vaqtinchalik to‘xtatish;
- Federal hukumatga so‘z erkinligini tiklash va senzurani bekor qilish to‘g‘risidagi ko‘rsatma;
- Harbiy xizmatchilar va ayrim boshqa toifalardan tashqari davlat xizmatiga ishga qabul qilishni to‘xtatib turish;
- Barcha davlat xizmatchilariga masofaviy ish shaklidan voz kechib, darhol ofislarga qaytish haqidagi farmoyish;
- Barcha federal idoralarga yashash qimmatlashuvi muammosini hal etish bilan shug‘ullanish to‘g‘risidagi ko‘rsatma;
- Oldingi administratsiyaning siyosiy raqiblarini ta’qib qilish uchun sud tizimidan foydalanishni taqiqlash;
- BMTga AQSHning Iqlim bo‘yicha Parij bitimidan chiqishi haqidagi maktub.
Hujjatlarni tasdiqlashni yakunlagach, Tramp o‘z tarafdorlari to‘dasiga farmoyishlarni imzolagan bir nechta ruchkani otib yuborgan. Tadbirdan so‘ng u yangi farmonlarni imzolash uchun Oq uyga yo‘l olgan.
AQSHdagi 5-noyabr kuni bo‘lib o‘tgan saylovlarda Tramp 312 ta, Harris esa 226 ta ovoz olgandi. G‘alaba qozonish uchun esa 270 ta ovoz olish lozim edi. Tramp rasman 2025-yil 20-yanvarda davlat rahbari lavozimiga kirishdi.
U prezidentlik davrida urushni 24 soat ichida tugatishni va‘da bergan, shuningdek, Ukrainaga harbiy yordam ajratilishini tanqid qilgan. Urushni bir sutka ichida tugatish va’dasi haqida inauguratsiyadan keyin shunday degan:
Faqat yarim kun o‘tdi. Yana yarim kun vaqtim bor. Ko‘ramiz. Biz ulgurishni istaymiz, deya javob bergan AQSH prezidenti.
Izoh (0)