Хитойда одамлар роботлар билан рақобатлашадиган дунёдаги илк югуриш марафонини ўтказиш режалаштирилмоқда. Бу ҳақда South China Morning Post хабар берди.
Марафон апрель ойида Пекиннинг Дасин районида бўлиб ўтиши кутилмоқда. Унда дунё бўйлаб компаниялар томонидан ишлаб чиқилган одамсимон роботлар 12 000 нафар инсонлар билан югуради.
“Бу мисли кўрилмаган мусобақалар Хитойнинг сунъий интеллект ва робототехника соҳасида жаҳон етакчисига айланишга бўлган улкан интилишини акс эттиради”, деб ёзади Interesting Engineering.
Пойга 21 километрлик масофани қамраб олади. Энг яхши уч нафар иштирокчига совринлар топширилади.
“Пекин иқтисодий-технологик тараққиёт райони томонидан тақдим этилган шартларга кўра, бутун дунёдаги компаниялар, илмий-тадқиқот институтлари, робототехника клублари ва университетлар марафонда ўз роботлари билан иштирок этади”, дейилади хабарда.
Ишлаб чиқувчиларга қўйиладиган асосий талаб роботлар инсон қиёфасига максимал даражада ўхшаш бўлиши керак. Улар икки оёқда юриш ёки югуриш имконини берадиган механик тузилма билан жиҳозланган бўлиши лозим. Роботларнинг бўйи 0,5 дан 2 метргача бўлиши керак.
Мусобақада масофадан бошқариладиган ҳамда тўлиқ автоном роботлар иштирок этишига рухсат берилади, пойга давомида уларнинг батареяларини алмаштириш мумкин.
Изоҳ (0)