Pentagon tomonidan e’lon qilingan hisobotda aytilishicha, Xitoy o‘zining yadroviy salohiyatini oshirib, Rossiya bilan aloqalarni mustahkamlagan. Bu haqda Military sayti xabar berdi.
Xitoy harbiy qudratiga baho beriladigan mazkur hujjat qonunchilar talabi bilan har yili Kongressga topshiriladi. Unga ko‘ra, 2023-yil may holatiga mamlakatda 600 dan ortiq yadroviy kallak bo‘lgan. 2030-yilga borib bu ko‘rsatkich 1000 dan oshishi kutilmoqda.
Biroq hisobotda Xitoy qurolli kuchlarining yuqori organlarida avj olgan korruspiya da'volari Pekinning rejalariga salbiy ta'sir o‘tkazib, modernizatsiya kampaniyasini sekinlashtirishi mumkinligi alohida qayd etiladi. So‘nggi vaqtlarda mazkur ayblov bilan kamida 15 nafar yuqori martabali amaldor lavozimidan chetlatilgan.
“Korrupsiya to‘lqini Xitoy qurolli kuchlarining barcha bo‘limlariga ta'sir qiladi. Bu siyosatchilarning harbiylarga ishonchiga putur yetkazgan bo‘lishi mumkin”, deyiladi hujjatda.
2024-yilning iyun oyida Xitoy sobiq mudofaa vaziri Li Shanfu va undan oldingi vazir Vey Fenxe hukmron Kommunistik partiya safidan chiqarib yuborilgandi. Bunga korrupsiya ayblovi sabab bo‘lishi mumkin. Noyabr oyiga kelib, amaldagi mudofaa vaziri Dong Jun ham tergovga tortilgani ma’lum qilindi.
Shunga qaramay, Pekin ayrim yutuqlarni qo‘lga kiritdi. Ismini oshkor qilmaslik sharti bilan Military saytiga intervyu bergan xitoylik rasmiyning ogohlantirishicha, Xitoy yanada xilma-xil va murakkab yadroviy qurollarni rivojlantirish ustida ish olib boryapti. Yadroviy kallaklar sonini izchillik bilan oshirish bilan bir qatorda, ularning texnologik imkoniyatlari ham kengaytirilmoqda.
Biroq mudofaa sohasidagi yuqori martabali amaldorning ta’kidlashicha, Xitoy harbiy salohiyatidagi o‘zgarish tendensiyasini turlicha baholash mumkin. Chunki ba'zi dasturlarda taraqqiyotga erishilgan, boshqalarida orqaga qaytish kuzatilgan.
Hisobotda Xitoyning uchuvchisiz uchish tizimlari sohasidagi yutuqlariga ham e’tibor qaratilgan. Hujjatga ko‘ra, Xitoy “AQSh standartlariga yaqinlashib kelmoqda”.
AQSh rasmiylari Pekining Moskva bilan aloqalari mustahkamlanganini Xitoy Rossiyaga ikki xil maqsadga mo‘ljallangan mahsulotlar sotgani bilan izohlagan. Ularni fuqarolik va harbiy ehtiyojlarda qo‘llash mumkin.
“Pentagonning milliy mudofaa strategiyasi Xitoy atrofida qurilgan. Boisi mamlakat AQSh uchun eng yirik potensial xavf hisoblanadi. Ikki o‘rtada Tayvan hamda Filippin borasida kelishmovchiliklar bor. Shunga qaramay, mandati yakunlanib borayotgan prezident Bayden Pekin bilan muvozanatli siyosat yurtishga harakat qilib kelgani e’tirofga loyiq” deyiladi Military saytidagi maqolada.
Izoh (0)