Бизнес-омбудсман девонига 2024 йилнинг 11 ойи давомида наманганлик тадбиркорлардан 300 га яқин мурожаат келиб тушган. Бу ҳақда вилоятда ўтказилган пресс-тур давомида маълум қилинди, дея хабар беради “Дарё” мухбири Азизбек Абдувалиев.
Фото: Оқилхон Мамажонов
Ушбу мурожаатлар юзасидан тадбиркорларнинг ҳуқуқларини ҳимоя қилиш бўйича 150 та таъсир чораси қўлланган. Текширувлар қонунийлиги юзасидан ўтказилган мониторинг доирасида назорат органлари томонидан 17 та ноқонуний текширув ўтказилганлиги ҳамда 100 дан ортиқ ҳолатда текширишлар тартиби бузилганлиги аниқланган.
Қон таҳлиллари асосида турли касалликлларни аниқлайдиган экспресс тестлар яқингача мамлакатга четдан олиб келинган. Бизнес-омбудсман кўмаги билан мазкур лойиҳа Наманганда йўлга қўйилиб, ҳозирда ушбу тиббиёт маҳсулотлари вилоятда ишлаб чиқарилмоқда. “Нам биотест” корхонаси жорий йили экспресс тестлар етказиб бериш бўйича 20 миллиард сўмлик шартнома имзолади. Шунингдек, уларни қўшни давлатлар ва Россияда рўйхатдан ўтказиш бўйича дастлабки қадамлар қўйилди.
Фото: Оқилхон Мамажонов
Заргарлик ўқув юрти ва маҳаллий заргарлар кооперациясини ташкил этиш учун вилоятдаги техникумлардан бирининг бино-иншоотларидан фойдаланиш юзасидан таклиф киритилиши натижасида мазкур кўчмас мулк Наманганда ушбу йўналишдаги йирик корхоналардан бири — “Гавҳар” компанияга берилди. Заргарлик буюмлари ва эсдалик совғалари ишлаб чиқараётган корхонада шу ном остидаги бренд яратилиб, Италия, Туркия ва Германиянинг замонавий технологиялари қўлланмоқда.
Фото: Оқилхон Мамажонов
Наманганда фаолият юритаётган “Lactalis аgrо” хорижий корхонаси ҳудуди яқинидан ўтган автомагистрал қурилиши жараёнида юқори кучланишли электр линияси зарар кўрганлиги сабабли корхона фаолияти маълум вақт тўхтаб қолган ва маҳсулотларни сақлаш муаммога айланганди. Бизнес-омбудсман сайъ-ҳаракатлари билан йўл қисми қайта қурилиши таъминланди ва юқори кучланишли электр таъминотидаги узилишга барҳам берилди. Шунингдек, назорат қилувчи органлар томонидан ўтказилган текширув давомида корхона ҳисоб рақамига қўйилган чеклов туфайли корхона 1,6 миллиард сўм зарар кўриш арафасида бўлган. Бизнес-омбудсман аралашуви билан корхона ҳисоб рақамига қўйилган тақиқ олиб ташланди ва ишлаб чиқариш жараёни давом эттирилди.
Бизнес-омбудсман матбуот хизмати томонидан ташкилланган пресс-тур давомида журналистлар юқоридаги корхоналарда бўлиб, уларнинг фаолияти билан танишиш ва саволларига жавоб олиш имкониятига эга бўлди.
Изоҳ (0)