Muxolifatdagi “Toburo” demokratik partiyasi tomonidan nazorat qilinadigan Janubiy Koreya milliy assambleyasi oktabr oyida Seulda yuz bergan tiqilinchga hukumatning muvaffaqiyatsiz reaksiyasi sabab ichki ishlar vaziri Li San Minni iste’foga yuborish tashabbusi bilan chiqdi. Tiqilinchda 150 dan ortiq odam halok bo‘lgandi.
Ovoz berishda ishtirok etgan 183 deputatdan 182 nafari taklifni qo‘llab-quvvatladi, bir ovoz haqiqiy emas deb topildi. Shu bilan birga, bu taklifga qarshi chiqqan hukmron “Xalq kuchi” partiyasi a’zolari ovoz berishni boykot qilib, jarayon boshlanishidan oldin ommaviy ravishda zaldan chiqib ketdi.
Taklif uchun kamida 150 nafar qonunchining qo‘llab-quvvatlovi kerak. Demokratlar esa Milliy assambleyadagi 299 o‘rindan 169 tasiga egalik qiladi. Parlament tomonidan ma’qullangan hujjat odatda prezidentga bir kun ichida uzatiladi.
Shu bilan birga, Yonhap xabar qilishicha, Janubiy Koreya prezidenti Yun Sok Yol bu tashabbusni rad etishi kutilmoqda. Ammo shunday bo‘lgan taqdirda, Demokratik partiya ichki ishlar vaziriga impichment e’lon qilish bilan tahdid qilgan.
Seuldagi tiqilinch 30-oktabrga o‘tar kechasi ko‘ngilochar inshootlar joylashgan Itxevon tumanida Xellouin bayramini nishonlash vaqtida yuz bergandi. Oxirgi ma’lumotlarga ko‘ra, hodisa oqibatida 158 kishi halok bo‘lgan, 196 kishi jarohatlangan. Qurbonlar — asosan yoshlar, aksariyati ayollardir. Ular orasida jami 22 nafar xorijlik bor.
Izoh (0)