Janubiy Koreyaning muxolifatdagi eng yirik “Toburo” partiyasi prezident Yun Sok Yol va mudofaa vaziri Kim Yon Xyonni davlatga xiyonatda ayblamoqchi. Bu haqda Yonhap xabar berdi.
Bunday ayblov harbiy holat to‘g‘risidagi qarorni qabul qilish va unga bog‘liq harakatlarni qo‘llab-quvvatlaganlik ortidan berilishi mumkin. “Toburo” partiyasi allaqachon Yun Sok Yoldan iste’foga chiqishni talab qilgan, aks holda impichment protsedurasi boshlanadi.
Prezident iste’fosini Janubiy Koreya kasaba uyushmalari federatsiyasi ham talab qilib, ular muddatsiz ish tashlashni boshlaganini e’lon qildi. “Toburo” bayonotiga ko‘ra, davlat rahbarining xatti-harakatlari “konstitutsiyani buzgan va janob Yun harbiy holat e’lon qilish uchun zarur bo‘lgan talablardan birortasini bajarmagan”.
Bu isyonning jiddiy harakati va impichment uchun ajoyib sabab, deyiladi partiya bayonotida.
Janubiy Koreyada harbiy holat
Janubiy Koreya prezidenti Yun Sok Yol 3-dekabr kuni kechqurun mamlakatda favqulodda harbiy holat e’lon qildi. U 45 yil ichida mamlakatda harbiy holat e’lon qilgan birinchi davlat rahbari bo‘ldi. Parlament va siyosiy partiyalarning faoliyati taqiqlandi. Davlat rahbari bu qarorni “konstitutsiyaviy tartibni himoya qilish va mamlakat ichidagi Shimoliy Koreya tarafdorlarini yo‘q qilish” zarurati bilan izohladi.
Hukumat harakatlaridan norozi bo‘lib, parlament binosi oldida namoyishchilar to‘plandi. Politsiya parlamentga kirishni to‘sib qo‘ydi va shahar ko‘chalarida harbiy texnika paydo bo‘ldi.
Bir necha soatdan so‘ng 300 deputatdan 190 nafari parlamentga kirishga muvaffaq bo‘ldi va harbiy holatni bekor qilish uchun ovoz berdi. Muxolifat yetakchisi Li Je Men prezident qarorini “konstitutsiyaga zid” deb atadi va uni “xalqqa qarshi” qadam sifatida qoraladi. Kechroq Janubiy Koreya prezidenti mamlakatda joriy etilgan harbiy holatni bekor qilishga rozi bo‘ldi.
Izoh (0)