“Toshkent viloyatida mavjud avariya holatidagi va maʼnan eskirgan ko‘p qavatli uylarni renovatsiya qilish orqali aholi yashash sharoitlarini yanada yaxshilash chora-tadbirlari to‘g‘risida”gi Vazirlar Mahkamasi qarori loyihasi muhokamaga qo‘yildi.
Hujjat loyihasida keltirilishicha, Toshkent viloyatida eskirgan yoki yaroqsiz ko‘p qavatli uy-joy fondi xatlovdan o‘tkazilgan hamda instrumental o‘rganishlar natijasiga ko‘ra 23 ta uy avariya holatida deb topilgan, mazkur uy-joylarda yashovchi fuqarolar tomonidan uy-joy sharotini yaxshilash uchun yangi uy-joy qurib berish to‘g‘risida ko‘plab murojaatlar kelib tushgan.
Renovatsiya qilinishi belgilangan massivlarda ko‘p qavatli uy-joylarni qurish — elektron onlayn auksion savdolarida g‘olib bo‘lgan tadbirkorlik subyektlarining o‘z mablag‘lari, tijorat banklarining kreditlari va qonunchilik hujjatlarida taqiqlanmagan boshqa manbalar hisobidan amalga oshiriladi. Bunda ko‘p qavatli uy-joylar loyihalari hududdagi aholi daromadidan kelib chiqqan holda ishlab chiqilishi lozim.
Toshkent viloyati hokimligi o‘n kun muddatga renovatsiya qilinishi belgilangan uy-joylar o‘rnida O‘rta Chirchiq, Bo‘stonliq tumanlarida qavatlar soni 5 tadan, Chirchiq, Olmaliq shaharlari, Qibray tumanida qavatlar soni 7 tadan kam bo‘lmagan zamonaviy uy-joy qurish uchun talabgorlarni aniqlash bo‘yicha loyihalarni elektron tender savdolariga chiqarilishini taʼminlaydi.
Bunda, ko‘p qavatli uy-joylar buzilishidan chiqgan yaroqli qurilish materiallari loyiha tashabbuskorlari tasarrufida qolishi ko‘rsatib o‘tiladi; Olmaliq shahri bosh plani ishlab chiqilganini hisobga olgan holda ko‘p qavatli uy-joy “Yangi O‘zbekiston” massividan bosh planga muvofiq qurilish inobatga olinadi.
11 oy muddatda mulkdorlarga kvartira topshirilgunga qadar ularga ko‘p qavatli uy-joy joylashgan tuman (shahar) hokimiyatining mahalliy budjetning qo‘shimcha manbalari yoki tashabbuskor tadbirkorlarning o‘z mablag‘lari hisobidan moliyalashtirish sharti bilan vaqtinchalik ijaraga turarjoy beriladi. Qurilish ishlari belgilangan muddatda foydalanishga topshirilmagan taqdirda ijara loyiha tashabbuskori mablag‘i hisobidan qoplanishi inobatga olinadi.
Mulkdorlarga o‘ringa-o‘rin ajratishdan ortgan kvartiralar prezidentning “Ipoteka krediti mexanizmlarini takomillashtirishga oid qo‘shimcha chora-tadbirlar to‘g‘risida” farmoni bilan joriy etilgan bozor tamoyillariga asoslangan ipoteka kreditlari orqali aholini uy-joy bilan taʼminlashning yangi tartibi doirasida belgilangan tartibda realizatsiya qilinadi, shu jumladan, ipoteka krediti bo‘yicha subsidiya xabarnomasi olgan fuqarolarga ustuvor tarzda.
Qurilishda energiya tejamkor materiallarini keng joriy etish orqali uy-joy qurilishi vaqti va tannarxini pasaytirish maqsadida:
- loyiha-smeta hujjatlarini ekspertizadan o‘tkazish jarayonida ularda energiyatejamkor qurilish materiallari qo‘llanganligiga alohida eʼtibor qaratiladi.
Eslatib o‘tamiz, 2021-yil may oyida prezident raisiligida o‘tkazilgan yig‘ilishda O‘zbekistonda 2021-yilda 2 ming 400 ta, kelgusi 2 yilda 4 ming 100 ta ko‘p qavatli uylar ta’mirlanishi ma’lum qilingandi.
Izoh (0)