Qiziqchi Avaz Oxun ilk yakkaxon konsertini bundan roppa-rosa 10 yil avval “Turkiston” sanʼat saroyida “Yangisini eshitdingizmi?” nomli dastur bilan boshlagandi. Yil sayin uning muxlislari bilan birga konsert seanslari ham ortib boraverdi. Qiziqchining taklifiga ko‘ra, “Daryo” jamoasi 10 yillik yubiley konsertiga tashrif buyurdi va sahna orti jarayonlari haqida reportaj tayyorladi.
Qiziqchini qo‘llab-quvvatlash uchun konsertga hamkasblari, shou-biznes olami vakillari tashrif buyurishdi. Zokir Ochildiyev konsertning birinchi kuniga taklifnoma berilmagan bo‘lsa-da, Avaz Oxunni qo‘llab-quvvatlash uchun kelganini va uni raqobatchi emas, uka sifatida hurmat qilishini aytib o‘tdi.
Avaz Oxun avvalgi konsert dasturlarida mehmon sanʼatkor sifatida yosh isteʼdodlarni sahnaga olib chiqardi. Bu safar esa Botir Qodirov konsert mehmoni bo‘ldi. U jonli ijrodagi qo‘shiqlari bilan muxlislarni quvontirdi.
Avaz Oxun o‘z qadriyatlariga amal qiladigan ijodkor. Shu kungacha uning birorta yakkaxon konsert dasturi O‘tkir Siddiqov boshlovchiligisiz o‘tmagan. Qiziqchi bu anʼanaga sodiqligini ustozi Hojiboy Tojiboyev bilan bog‘laydi. Yaʼni O‘tkir Siddiqov marhum ijodkorning ham konsertlariga boshlovchilik qilardi.
Ammo bu yilgi konsert O‘tkir Siddiqovning ishtirokisiz boshlandi.
— Ustoz 80 yoshni qarshilab qolgan, bugun katta sahnada u kishiga to‘n kiydirishni niyat qilgandim. U inson nihoyatda masʼuliyatli, biror marta konsertlarga kech qolmagan. Afsuski, konsertning birinchi kunida yo‘llar biroz tirbandligi uchun asabiylashib, shoshib keldi. Bu holat o‘z-o‘zidan sog‘lig‘iga ham taʼsir etgan. Shu bois sahnaga chiqmay, uyga ketganlari yaxshi deb o‘yladik. Ishonamizki, qolgan seanslarda ustoz bilan bilan birga bo‘ladi, — deydi Avaz Oxun.
Konsertdagi ko‘tarinki ruhni bir so‘z bilan ifodalab bo‘lmaydi. Uni ko‘rish yoki u haqda tayyorlangan maxsus reportajni tomosha qilish kerak. Shunday ekan “Daryo”ning YouTube’dagi kanaliga kirib, videoni to‘liq holda tomosha qiling.
Izoh (0)