Tojikiston Ichki ishlar vazirligi respublika prezidenti Emomali Rahmon topshirig‘iga ko‘ra okkultatsion amaliyotlar tarqalishiga qarshi yirik reyd o‘tkazdi.
Reyd davomida “jodugarlik va folbinlik” bilan shug‘ullangan 1,5 ming kishi qo‘lga olindi.
“Ularning barchasi ro‘yxatga olindi”, deydi prezident.
Rahmonga ko‘ra, reyd davomida rasmiy diniy ma’lumotga ega bo‘lmagan 5 mingdan ortiq din peshvolari ham qo‘lga olingan.
Avvalroq Tojikiston prezidenti diniy arboblar bilan uchrashuvda mamlakatda okkultizm amaliyotlari keng tarqalayotganini e’lon qilgan va ularga qarshi kurashishga chaqirgan edi. Uning so‘zlariga ko‘ra, bu “mamlakatni xurofotga yetaklamoqda”.
Aprel oyida Tojikiston Ichki ishlar vazirligi qonunchilikka o‘zgartirishlar kiritilganini eʼlon qilgan edi. Unga ko‘ra, tabiblar, folbinlar, sehrgarlar va tumor ishlab chiqaruvchilar niqobi ostida firibgarlik hamda odamlarni aldaganlik uchun olti oygacha majburiy mehnat nazarda tutilgan.
Shuningdek, folbin va sehrgarlar xizmatidan foydalanuvchi fuqarolarning maxsus reyestri tashkil etilgani haqida ham ma’lum qilingan. Vazirlik avgust oyida reyestrga allaqachon 150 dan ortiq kishi kiritilganini ma’lum qilgan.
Izoh (0)