2024-yilning 30—31-oktyabr kunlari Toshkent shahrida “Yevropa ittifoqi – Markaziy Osiyo yosh yetakchilari konferensiyasi: barqaror suv harakati paradigmasini o‘zgartirish” mavzusida mintaqaviy konferensiya bo‘lib o‘tdi.
Konferensiya suv resurslarini boshqarish va odamlar o‘rtasidagi aloqalarning muhim mavzulari bo‘yicha Yevropa ittifoqi – Markaziy Osiyo “yo‘l xaritasi”ni amalga oshirishni qo‘llab-quvvatlagan holda Markaziy Osiyoning beshta davlatidan 35 yoshgacha bo‘lgan 100 nafarga yaqin ishtirokchini o‘zida jamladi.
Jumladan, talabalar, tashabbuskor yoshlar, fuqarolik jamiyati tashkilotlari, tadqiqotchilar, ommaviy axborot vositalari, yosh siyosatchilar, shuningdek, hukumat ekspertlari vakillari ishtirok etmoqda.
-tUiP1PLK.jpg)
Konferensiyaning ochilishida O‘zbekiston Respublikasi suv xo‘jaligi vaziri Shavkat Hamroyev, Qozog‘iston Respublikasi prezidenti maslahatchisi Zulfiya Suleymenova, Tojikiston Respublikasi energetika va suv xo‘jaligi vazirining birinchi o‘rinbosari Jamshed Shoimzoda nutq so‘zladi. Konferensiyada Yevropa ittifoqiga aʼzo davlatlar elchilari, Birlashgan Millatlar Tashkiloti va Jahon sog‘liqni saqlash tashkiloti vakillari, shuningdek, Yevropa Xavfsizlik va Hamkorlik Tashkilotining O‘zbekistondagi vakillari ishtirok etdi. Konferensiyada Yevropa ittifoqining Markaziy Osiyodagi delegatsiyalari vakillari ham qatnashdi.
-QMcYJICv.jpg)
Mazkur konferensiya Markaziy Osiyo va mintaqalar bo‘ylab mintaqaviy muloqot va sheriklikni kuchaytiradi, shuningdek, Yevropa ittifoqining jamoatchilikka taʼsiri va ko‘rinishini oshiradi, iqlim barqarorligi va suv resurslarini boshqarish bo‘yicha harakatlarini amalga oshirishga ko‘maklashadi.
— “Menimcha, Markaziy Osiyodagi suv muammolarini hal qilishda Yevropa tajribasi juda foydali bo‘ladi. Biz suv, energetika va iqlim sohalarida Markaziy Osiyo uchun qator loyihalarni boshladik. Bugungi konferensiya orqali esa uni targ‘ib qilmoqchimiz. Bu masalaga yoshlarni jalb etish ham juda muhim. Chunki Markaziy Osiyo aholisining yarmini yoshlar tashkil etadi va suv taʼminotini takomillashtirish, uni tejash, shuningdek, suv resurslari sohasida hamkorlikni rivojlantirish muhim ahamiyatga ega. Bundan tashqari, bugungi uchrashuvdan asosiy maqsad Markaziy Osiyo yoshlarini birlashtirishdir. Yevropa ittifoqiga aʼzo davlatlar, Fransiya, Germaniya va Yevropa ittifoqining ayrim loyihalari O‘zbekistonda ham moliyalashtiriladi. O‘ylaymanki, suvni tejovchi texnologiyalarni O‘zbekistonga olib kelish borasida hali ko‘p ishlarni qilish mumkin. Shuningdek, Qozog‘iston, Qirg‘iziston, Tojikiston bilan suv masalalari bo‘yicha qator yirik loyihalar amalga oshirilmoqda. Jahon banki va Yevropa investitsiya jamg‘armasi tomonidan qo‘llab-quvvatlangan qator yirik loyihalar ham mavjud. Ular manfaatli bo‘ladi va biz O‘zbekiston hukumati va institutlari bilan kelgusida ham hamkorlik qilishni istaymiz”, deydi Yevropa ittifoqi delegatsiyasining Qozog‘istondagi vakili Yoxannes Baur.
Konferensiyadan tayyorlangan maxsus reportajni tomosha qiling:
Izoh (0)