Tojikistonda axloqsiz va zo‘ravonlik mazmunidagi videoroliklar hamda o‘yinlarni o‘ynash qat’iyan taqiqlandi. Bu haqda Dushanbe Ichki ishlar boshqarmasi xabar berdi.
Huquqni muhofaza qiluvchi organlar tahliliga ko‘ra, ba’zi yoshlar va o‘smirlar muntazam ravishda bunday o‘yinlarga berilib, ularning salbiy ta’siri ostida turli jinoyatlarni sodir etadi.
Bu, ayniqsa, Tojikiston madaniyat vazirligi xulosasiga ko‘ra, zo‘ravonlik, shafqatsizlik, qotillik va talonchilik elementlarini o‘z ichiga olgan Counter Strike va Grand Theft Auto (GTA) kabi mashhur o‘yinlarga taalluqli, deyiladi poytaxt IIB xabarida.
Yana qaysi o‘yinlar taqiq ostiga tushgani ma’lum qilinmagan. Biroq fuqarolardan farzandlarini nazorat qilish va ularni zo‘ravonlikni targ‘ib qiluvchi o‘yinlarga qo‘ymaslik so‘ralmoqda.
Taqiqning bajarilishini ta’minlash uchun poytaxtdagi internet-kafelarda muntazam reydlar va tekshiruvlar o‘tkazish rejalashtirilgan.
2017-yil iyun oyida Dushanbe meri Rustam Emomali voyaga yetmaganlarning tungi vaqtda ko‘ngilochar markazlar va internet-kafelarga borishini taqiqlash to‘g‘risida qaror qabul qilgandi. Bu o‘smirlar manfaatlarini himoya qilish va ular tomonidan huquqbuzarliklarning oldini olishga qaratilgani ta’kidlangan.
Izoh (0)