Arab muvofiqlashtirish guruhi (AMG) Qozog‘iston loyihalariga 7 milliard dollar sarmoya kiritishni rejalashtirmoqda. Bu haqda Qozog‘iston bosh vaziri matbuot xizmatiga tayanib Kaztag xabar berdi.
“Erishilgan kelishuvlar doirasida Qozog‘iston iqtisodiyotiga uzoq muddatli to‘g‘ridan to‘g‘ri investitsiyalar hajmi dastlabki bosqichda 7 milliard dollarni tashkil qilishi mumkin. Kelgusida ular moliyalashtirish hajmini oshirishni rejalashtirmoqda”, deyiladi xabarda.
Ostona shahrida Islom taraqqiyot banki, Saudiya taraqqiyot jamg‘armasi, OPEK Xalqaro taraqqiyot jamg‘armasi, Kuvayt Iqtisodiy taraqqiyot jamg‘armasi va Abu-Dabi taraqqiyot jamg‘armasi kabi institutlarni birlashtirgan Arab muvofiqlashtirish guruhining davra suhbati bo‘lib o‘tdi.
Uchrashuv davomida AMG tomonidan Qozog‘iston uchun ustuvor ahamiyatga ega bo‘lgan infratuzilma va ijtimoiy loyihalarni moliyalashtirishga alohida to‘xtalib o‘tildi.
Qayd etilsihicha, davra suhbati doirasida transport, energetika, suv resurslari, sog‘liqni saqlash sohalaridagi loyihalar taqdimoti o‘tkazilgan, Qozog‘istonning 2030-yilgacha bo‘lgan milliy infratuzilma rejasi taqdim etilgan.
Uchrashuv yakunlari bo‘yicha tomonlar davra suhbati bayonnomasini, Qozog‘iston hukumati va OPEK jamg‘armasi o‘rtasida xususiy sektor operatsiyalari bo‘yicha doiraviy bitim, Suv xo‘jaligi va irrigatsiya vazirligi hamda Islom taraqqiyot banki o‘rtasidagi muzokaralar bayonnomasi imzolandi.
Izoh (0)