Toshkent shahrida 5-dekabr kuni iqlim o‘zgarishi mavzusida bo‘lib o‘tgan yig‘ilishda qishloq xo‘jaligi vaziri o‘rinbosari Alisher To‘rayev O‘zbekistonning agrar soha hamda iste’mol uchun suv resurslari yetarli miqdorda ekanini aytib o‘tdi, deya xabar bermoqda “Daryo” muxbiri Abduqahhor Qosimov.
Alisher To‘rayevning ma’lum qilishicha, mamlakatda chuchuk suv miqdori tobora kamayayotgani haqida aytilayotgan bo‘lsa ham, aslida suv zaxiralari yetarli.
Chet el ekspertlarining xulosasiga ko‘ra, O‘zbekistonda suv yetarli. Shunchaki biz suvni yovvoyichasiga ishlatamiz. Undan foydalanishni o‘rganishimiz kerak, — deydi vazir o‘rinbosari.Uning ta’kidlashicha, Isroil zamonaviy texnologiyalar orqali suvni juda tejab ishlatadi.
O‘zbekiston ham ana shu tajribadan foydalanishi zarur. Isroil texnologiyasini olib kelib, o‘zimizda yo‘lga qo‘ysak, bizda suv bilan umuman muammo bo‘lmaydi. Mahsulotni ko‘paytirsak ko‘paytiramizki, kamaytirmaymiz. Hozirgi tendensiya bo‘yicha ketsak, prognozlar yomon bo‘lmaydi. Chunki hozir ommaviy tarzda tomchilab sug‘orish yo‘lga qo‘yilyapti. Xalq o‘rganyapti shuni, yaxshi bo‘ladi, — dedi Alisher To‘rayev.Eslatib o‘tamiz, yig‘ilishda, shuningdek, O‘zbekistonda bir daqiqada 9 metr kvadrat cho‘llanish ro‘y berayotgani haqida aytib o‘tilgan. Ma’lum qilinishicha, qishloq xo‘jaligida suvdan foydalanish shu zayl davom etaveradigan bo‘lsa, 2030-yilga borib O‘zbekiston dunyodagi 33 ta suv tanqis davlatlar qatoriga tushib qolishi mumkin.
Suv resurslaridan oqilona foydalanish masalasi
2023-yilda Italiyaning Rim shahrida atrof-muhit va suv resurslari bo‘yicha “Yevropa Ittifoqi—Markaziy Osiyo” xalqaro konferensiyasi bo‘lib o‘tadi. Unda iqlim o‘zgarishi oqibatlarini yumshatish, inklyuziv “yashil o‘sish”ga o‘tish, suvdan oqilona foydalanish, ekologik xavfsizlikni ta’minlash masalalari muhokama qilinadi.Qozog‘iston poytaxti Ostona shahrida 14-oktabr kuni bo‘lib o‘tgan MDHga a’zo davlatlar rahbarlari kengashining tor tarkibdagi yig‘ilishida nutq so‘zlagan Qosim-Jo‘mart To‘qayev iqlim o‘zgarishining salbiy ta’sirlari haqida aytib o‘tgandi. Qozog‘iston prezidentining aytishicha, MDHning deyarli barcha mamlakatlarida suv resurslari bilan ta’minlash muammosi kuchaymoqda.
“Butun hamdo‘stlik makonida suv xavfsizligini ta’minlash bo‘yicha umumiy yondashuvlar ishlab chiqish vaqti keldi. MDH Ijroiya qo‘mitasiga transchegaraviy suv resurslaridan o‘zaro manfaatli tarzda foydalanish bo‘yicha muayyan tavsiyalar kiritishni taklif qilaman”, — degandi Qosim-Jo‘mart To‘qayev.
Mavzuga doir:
- O‘zbekistonda 2050-yilga borib suv tanqisligi besh barobarga oshishi ma’lum qilindi
- O‘zbekistonda suv tanqisligining oqibatlarini yumshatish bo‘yicha alohida dastur qabul qilinadi
Mavzudan tashqari
Alisher To‘rayev mutaxassisligi bo‘yicha biolog-genetik, Lomonosov nomidagi Moskva davlat universitetini tamomlagan. Vena universiteti, Lomonosov nomidagi Moskva davlat universitetida, Rossiya Fizika-texnika institutida faoliyat yuritgan.2019-yilning iyun oyidan 2021-yil fevraligacha Toshkent davlat agrar universiteti “Qishloq xo‘jaligi ekinlari genetikasi, seleksiyasi va urug‘chiligi” kafedrasi professori lavozimida ishlagan. O‘tgan yilning fevral oyidan buyon qishloq xo‘jaligi vazirining o‘rinbosari — Qishloq xo‘jaligida bilim va innovatsiyalar milliy markazi bosh direktori lavozimida faoliyat yuritib kelmoqda.
Jamoatchilik uni milliy markaz o‘tkazgan 1 million dona uzum ko‘chatini sotib olish bo‘yicha shubhali tender orqali taniydi. O‘shanda in vitro usulida yetishtirilgan 9,95 milliard so‘mlik uzum ko‘chatlarini yetkazib berish bo‘yicha o‘tkazilgan tanlovda De Nova Agro kompaniyasi g‘olib bo‘lgandi. Kompaniya asoschisi bo‘lgan Bekjon To‘rayev esa Alisher To‘rayevning o‘g‘li hisoblanadi.
Tender natijalari atrofidagi holatni o‘rganish yuzasidan Qishloq xo‘jaligi vazirligi tomonidan komissiya tuzilgan. Monopoliyaga qarshi kurashish qo‘mitasi matbuot xizmati ham manfaatlar to‘qnashuvi bo‘lishi mumkin bo‘lgan vaziyatni o‘rganayotganini ma’lum qilgan. O‘rganish natijalari nima bilan yakunlangani noma’lum.
Izoh (0)