“Lans” muxlislari jamoaning oktyabr oyidagi eng yaxshi futbolchisini aniqladi.
Unda O‘zbekiston milliy jamoasi himoyachisi Abduqodir Husanov 82,84% ovoz olib, katta farq bilan birinchi o‘rinda qayd etildi. Keyingi o‘rinlarni yana bir himoyachi Fakundo Medina (7,93%) va yarim himoyachi Andi Diuf (2,58%) egalladi.
Oktyabr oyida 20 yoshli futbolchi “Lans” safida barcha 3 o‘yinda to‘liq harakat qildi va Sofascore talqiniga ko‘ra o‘yinlarda o‘rtacha 7 ball oldi. Joriy mavsumda Abduqodir klub safida 11 o‘yinda qatnashdi.
Avvalroq Abduqodirga APLning bir nechta klublari, xususan “Chelsi”, “Nyukasl” va “Arsenal” klublari qiziqish bildirayotgani ma’lum qilingandi.
Ma’lumot uchun, yosh himoyachi Futbol tarixi va statistikasi xalqaro federatsiyasi (IFFHS) 2004-yil 1-yanvardan keyin tug‘ilgan futbolchilar orasida dunyoning “Eng yaxshi yosh futbolchisi” bo‘lishga daʼvogar bo‘lgan 25 futbolchi ro‘yxatiga kiritildi.
Izoh (0)