O‘zbekistonlik iqtidorli yarim himoyachi FIFAga oilasi, tajribali futbolchilardan o‘rnak olishi va Olimpiya o‘yinlaridagi maqsadlari haqida gapirdi.
Diyor Xolmatov 2002 yilda tug‘ilganida Oksana Chusovitina allaqachon Olimpiya oltin medali, bir necha bor jahon chempioni unvonlari va boshqa qator mukofotlarni qo‘lga kiritgan edi.
Chusovitina to‘qqizinchi Olimpiadaga yo‘llanmani qo‘lga kiritishni maqsad qilgan, Xolmatov esa o‘z sayohatining boshida turibdi. Shu oyda bo‘lib o‘tadigan OFK U23 Osiyo Kubogi final bosqichiga tayyorgarlik ko‘rayotgan 21 yoshli futbolchi FIFA nashriga Parij—2024da O‘zbekiston bayrog‘i ostida Olimpiadada qatnashish uning uchun sharaf ekanligini aytib o‘tdi.
“Olimpiadada O‘zbekiston sportchilarini ko‘rish va ular bilan Parijga borish tuyg‘ularini birgalikda tuyish juda hayajonli bo‘lardi. O‘zbekistonda ko‘plab sport turlarida medallar uchun kurash olib boradigan taniqli sportchilar bor, ayniqsa Oksana Chusovitina. U nafaqat mamlakatimiz, balki jahon miqyosida badiiy gimnastika afsonasi hisoblanadi. U birinchi marta 1992-yilda Olimpiada o‘yinlarida qatnashgan va bo‘lajak Olimpiada uning uchun to‘qqizinchisi bo‘ladi! Uning professionalligi, chidamliligi va sportdagi uzoq faoliyati hamma uchun o‘rnak”.
Xolmatov hatto uyda, professional futbolchi bo‘lgan otasi Akmal Xolmatovdan ilhom oladi. Ota va o‘g‘il ham 16 karra O‘zbekiston chempioni bo‘lgan “Paxtakor” jamoasi bilan faoliyatini bog‘lagan.
“Men “Paxtakor” futbol klubi tarbiyalanuvchisiman va aynan shu yerdan mening futboldagi faoliyatim boshlandi. Garchi men Lionel Messi va boshqa ko‘plab o‘yinchilarning faoliyatidan ruhlansamda, otam men uchun asosiy namuna bo‘lib qoladi. U ham “Paxtakor”da o‘ynagan va uning raqami ham meniki kabi 8 edi. Biz hatto bir xil pozitsiyada o‘ynaymiz!”
Yoshlar miqyosida O‘zbekiston termasi so‘nggi yillarda kuchayib bormoqda, jamoa o‘tgan yili FIFA U17 Jahon chempionatida chorak finalga va avvalgi U20 Jahon chempionatida 1/8 finalga qadar yetib bordi. Hozirgacha Olimpiadaga qatnashish uchun bo‘lgan 7 urinish muvaffaqiyatsiz bo‘lsa-da, Xolmatov bu vaziyatni o‘zgartirishga qaror qilgan.
“O‘zbekistonning Olimpiya o‘yinlaridagi debyuti barchamiz uchun juda muhim, — dedi u. Biz bu orzuni ro‘yobga chiqarish uchun bor kuch-g‘ayratimizni ko‘rsatishga ahd qilganmiz. O‘zbekiston xalqi futbolni yaxshi ko‘radi va milliy terma jamoani juda hissiyotlar bilan qo‘llab-quvvatlaydi, bizning muvaffaqiyatimiz barcha uchun katta g‘urur va baxt manbai bo‘lishi shubhasiz”.
Xolmatov o‘zbek iste’dodining oltin avlod vakillaridan biri bo‘lishi mumkin. Markaziy yarim himoyachi hujumga yordam beruvchi yoki tayanch yarim himoyasida o‘ynashga qodir futbolchi bo‘lib, tarkibida “Lans” himoyachisi Abduqodir Husanov, Abbosbek Fayzullayev va Jasurbek Jaloliddinovlar bor jamoaning kalit o‘yinchisiga aylanishi mumkin. Xolmatovning so‘zlariga ko‘ra, ayrim futbolchilarning U23 Osiyo Kubogida ishtirok etishi hozircha noaniq bo‘lsa-da (intervyu olingan paytda legioner futbolchilarning ishtiroki hali tasdiqlanmagan edi), ular Olimpiadada ishtirok etish uchun bor imkoniyatlarini ishga solishga tayyor.
“Olimpiadaga borish bebaho tajriba va o‘zimizni yuqori darajada ko‘rsatish imkoniyati hisoblanadi. Tokiodagi o‘yinlarda Ispaniya va Braziliya terma jamoalari o‘rtasidagi final o‘yinida braziliyaliklar qo‘shimcha bo‘limlarda 2:1 hisobida g‘alaba qozonganini, ayniqsa Malkomning zaxiradan maydonga tushib g‘alaba golini urganini haligacha yorqin xotiralarimda saqlab qolganman.
Olimpiadaga chiqish uchun U23 Osiyo Kubogida yaxshi ishtirok etishimiz kerak va biz bunga to‘liq tayyormiz. Biz bu borada to‘rt yildan beri ishlayapmiz va maksimal imkoniyatlarimizni namoyish etamiz. Raqiblarimiz ham turnirga tayyorgarlik ko‘rganini tushunamiz, ammo biz o‘z kuchimizga ishonamiz va har qanday jamoaga qarshi o‘ynashga tayyormiz”.
Xolmatov o‘zining bir necha o'zbek afsonalari Maksim Shatskix va Timur Kapadze qo‘l ostida klub va milliy terma jamoa doirasida ishlash imkoniga ega bo‘lganini aytdi.
“Meni yoshligimdan taniqli murabbiylar tarbiyalagan. “Paxtakor”da asosiy tarkibga kirganim uchun Shota Arveladze va Maksim Shatskix bilan ishlash baxtiga muyassar bo‘ldim. Ularning ikkalasi ham o‘z mamlakatlarida davrining eng yaxshi o‘yinchilari edi va murabbiy bo‘lish orqali o‘zlarining qimmatli tajribalarini futbolchilarga o‘rgatadi”.
Endi 23 yoshgacha bo‘lgan jamoada biz bilan Timur Kapadzedek murabbiy bo‘lishi har qanday futbolchining orzusi. U yosh iqtidorlar bilan ishlashni, futbolchilarning salohiyatini ochib berishni biladigan zo‘r mutaxassis. Kapadze men bilan bir xil pozitsiyada o‘ynagan, shuning uchun u menga juda ko‘p muhim maslahatlar beradi”.
Yevropaning yetakchi klublari tomonidan kuzatilayotgan Xolmatov o‘zining faoliyati cho‘qqisi sari sayohati haqida fikr yuritar ekan, O‘zbekiston nega texnik jihatdan juda ko‘p iqtidorli o'yinchilarni yetishtirish bo‘yicha tajribaga ega ekanligini tushuntirdi.
“O‘zbekiston har doim iqtidorli futbolchilarni yetishtirgan va yetishtirishda davom etmoqda. Yosh futbolchilarning muvaffaqiyati ularning tinimsiz mehnati, mahoratini oshirishi, o‘z oldiga qo‘ygan maqsadlariga erishishdagi cheksiz ishtiyoqida sababdir. Murabbiylarimiz bu borada futbolchilarga yordam berishga doim tayyor.
Bolaligimga kelsak, men juda ko‘p futbol o‘ynaganman — ham “Paxtakor” akademiyasida, ham bo‘sh vaqtlarimda, ko‘chada do‘stlarim bilan futbol o‘ynashni sevardim. Otamning o‘yinlariga guvoh bo‘lganim mening ham yuqori darajaga chiqishimga sezilarli ta’sir ko‘rsatdi.
Men yosh futbolchi uchun imkon qadar to‘p bilan ishlash, jismoniy rivojlanish, taktikani o‘rganish va futbol haqida bilimlarini rivojlantirish juda muhimligiga qat’iy ishonaman”,— deydi “Paxtakor” yarim himoyachisi Diyor Xolmatov.
Izoh (0)