Debatxolda o‘tkazilayotgan siyosiy partiyalar ishtirokidagi teledebatda O‘zbekiston Xalq demokratik partiyasidan Qonunchilik palatasi deputatligiga qo‘yilgan nomzod - Sayyora Imamovaga Dori va tibbiy buyumlarni narxlarini qonun bilan cheklash taklifi aks samara bermaydimi? Ya’ni narx-navo bo‘yicha sog‘lom raqobatni cheklash dorilarning “qora bozori” gullab ketishiga yoki farmasevtika kompaniyalarining o‘zaro til biriktirishiga sabab bo‘lmaydimi mazmunidagi savol berildi.
Javob: Sayyora Imamova
Xalqimizda bir gap bor: “Chumchuqdan qo‘rqqan tariq ekmaydi”. Tibbiy buyum va dorilar aholining hayoti sifatiga ta’sir qiladigan ijtimoiy ahamiyatga ega tovarlar hisoblanadi. Bu borada faqat biznes manfaatlarini emas, ayni paytda aholining manfaatlarini ham hisobga olish kerak.
Ijtimoiy ahamiyatga ega tovar va xizmatlar narxini davlat tomonidan tartiga solish tajribasi dunyoning istalgan malakatida bor va bu zarur masala.
Kovid – 19 pandemiyasi davrida ayrim dorilar va tibbiy buyumlarning narxi bir necha o‘n baravar oshib ketgani hali ko‘pchilikning yodida bo‘lsa kerak.
Partiyamiz parlament, deputatlik hamda jamoatchilik nazorati yordamida ehtiyojmand aholiga dori-darmon vositalari, protezlash vositalari va boshqa tibbiy-ijtimoiy xizmatlarni xarid qilish qulay bo‘lishi uchun kurashadi. Shu maqsadda dori va tibbiy buyumlarni narxlari bo‘yicha cheklovlarni belgilash bo‘yicha “Dori-darmonlar va tibbiy vositalar narxlarini davlat tomonidan tartibga solish to‘g‘risida”gi Qonunni qabul qilishni taklif etmoqdamiz.
Bizning partiyamiz dori va tibbiy buyumlarning narxlarini to‘liq tartibga solishni nazarda tutmayapti. Balki, ularning narxi asossiz oshib ketishining oldini olish bo‘yicha nazoratni kuchaytirish bo‘yicha taklif bildiryapmiz.
Dori va tibbiy buyumlarning narxlari aholining xarid qobiliyatiga mos bo‘lishi kerak. Konstitutsiyamizda ham O‘zbekiston ijtimoiy davlat belgilab qo‘yilgan va bu esa dori va tibbiy buyumlarning narxlarini tartibga solishga monelik qilmaydi.
Izoh (0)