“Helen” va “Milton” to‘fonlaridan jabr ko‘rgan AQSHning Florida shtatida Vibrio vulnificus bakteriyasi yuqishi oqibatida 13 kishi halok bo‘ldi.
Sog‘liqni saqlash vazirligi maʼlumotlariga ko‘ra, shtatda jami 76 ta kasallik holati qayd etilgan, bu o‘tgan yilga nisbatan 30 taga ko‘pdir.
New York Post nashrining Florida sog‘liqni saqlash departamentiga tayanib yozishicha, bo‘ronlardan keyin qolgan sel suvlari turli bakteriyalar, jumladan, Vibrio vulnificus uchun qulay yashash joyiga aylangan. Mazkur virus ochiq yaralarga dengiz suvi tegishi yoki xom dengiz mahsulotlarini iste’mol qilish orqali yuqishi mumkin. Alomatlar orasida isitma, titroq, past qon bosimi va terining shikastlanishi mavjud.
CNN maʼlumotlariga ko‘ra, 26-sentyabr kuni Florida shtatida “Helen” to‘foni sodir bo‘lganidan keyin Vibrio vulnificus infeksiyasi bilan kasallanganlar soni 6 tadan 76 taga ko‘paygan. Sentyabr boshida birorta ham kasallik qayd etilmagan Pinellas okrugida 13 kishi kasallangan. Amerika Kasalliklarni nazorat qilish va oldini olish markazi ma’lumotlariga ko‘ra, Qo‘shma Shtatlarda o‘rtacha 150 tadan 250 tagacha Vibrio vulnificus infeksiyasini yuqtirish holatlari qayd etilgan. Infeksiya yuqqan har beshinchi odam vafot etadi.
Floridada “Helen” to‘foni 200 kishining hayotiga zomin bo‘lgan bo‘lsa, 5-oktyabrda shtatga yopirilgan Milton to‘foni oqibatida 17 kishi halok bo‘ldi. Hisobotlarga ko‘ra, “Helen” va “Milton”dan ko‘rilgan zarar 195-230 milliard dollarni tashkil qiladi.
Izoh (0)