Joriy yil bo‘lib o‘tadigan saylovlar, bir jihati bilan har yilgi saylovlardan farq qilayotganini kuzatish mumkin. Ushbu saylovlarda partiyalar televideniye va ijtimoiy tarmoqlarda ancha faol ko‘rinmoqda, har kuni OAVda partiyalarning Saylovoldi dasturidagi muhim tashabbuslari, saylovchilar bilan uchrashuvlari, tashviqot tadbirlari xususida qandaydir yangilikka ko‘zimiz tushmoqda.
Ayniqsa, Xalqaro press klubda siyosiy partiya liderlari ishtirokida yangi formatda tashkil etilgan teledebatlar ko‘pchilikda qiziqish uyg‘otmoqda. Uni kuzatib, mamlakatimizda ham siyosiy partiyalar o‘rtasida raqobat muhiti kuchayotganini his qilish mumkin.
Ayniqsa, partiya rahbarlarining saylovchilar oldida o‘z Saylovoldi dasturida ilgari surayotgan muhim tashabbuslari bo‘yicha taqdimoti, fuqarolarimizni qiynab kelayotgan og‘riqli muammolar bo‘yicha berilgan savollar va partiyaning ushbu muammolar yechimi bo‘yicha pozitsiyasi haqidagi fikrlari, rivojlangan mamlakatlardagi parlament saylovlari chog‘ida ko‘rib, kuzatib, o‘rganib qolgan haqiqiy raqobat muhitini eslatib yubordi.
Yana bir jihati, maʼlum masalalarda partiyalar o‘z tashabbusining ustun tomonlarini asoslab berayotgani kuzatilmoqda. Bu saylovchilarning qiziqishini ham oshirmoqda.
Menimcha chetdan turib “partiya jamiyatda nima o‘zgarish qildi” deb tanqid qilgandan ko‘ra “biz partiya bilan birga jamiyatda nimani o‘zgartiramiz” degan qarashni shakllantirish vaqti kelibdi.
Partiyalar kimdan kuch oladi? Albatta biz saylovchilardan, xalqimizdan.
Partiyalar allaqachon o‘z o‘rnini topgan, biz fuqarolar uyg‘onishimiz, siyosiy jarayonlarda faol bo‘lishimiz va asosli takliflarimizni uchrashuvlar va muloqotlar davomida partiyalarga yetkazishimiz hamda o‘z kelajagimizni qurishga befarq bo‘lmasligimiz kerak!
Izoh (0)