O‘zbekistonda 1-avgustdan elektr energiyasini hisoblashning yangi billing tizimi joriy etiladi. Bu haqda Spot xabar berdi.
Qayd etilishcha, 11-iyul kuni “Hududiy elektr tarmoqlari”da o‘tkazilgan matbuot anjumanida korxona boshqaruv raisi birinchi o‘rinbosari Alvar G‘aybullayev bu haqda gapirgan. Hozirda korxona isteʼmolchilariga yetkazib beriladigan elektr energiyasi hisobi 2012-yilda joriy qilingan billing to‘lov tizimi asosida yuritiladi.
“Bizga zamonaviy billing tizimi kerak edi, 2022-yilning oxirida yangi tizim bo‘yicha texnik shartlar ishlab chiqildi. Joriy yilning 1-avgustidan butun mamlakatda mazkur tizim yangilanadi”, dedi G‘aybullayev.
Uning aytishicha, hozirda mazkur tizim sinov tarzida Toshkent shahrining Yakkasaroy tumanida joriy etilgan. Amaldagi tizimda abonentning ism-familiyasi, pasport maʼlumotlari va hisob-raqami bo‘lgan bo‘lsa, yangi tizimda abonentning kadastr maʼlumotlari, bitta odam nomida nechta hisob raqami borligi kabi maʼlumotlar mavjud bo‘ladi. Yangi tizimda monitoring ishlarini olib borish maqsadida isteʼmolchining shikoyat va takliflari, ularning soni ham yozib boriladi.
“Umuman boshqa billing bo‘ladi”, deydi Alvar G‘aybullayev.
Bundan tashqari, tizimning mobil ilovasi ham ishlab chiqildi. U orqali amalga oshirilgan to‘lovlar hamda isteʼmol qilingan elektr energiyasi miqdorini onlayn olish mumkin bo‘ladi.
Shuningdek, u “aqlli” hisoblagich bilan taʼminlanganlik darajasi 90 foizini tashkil etishini bildirdi. Hududlarda 782 mingta “aqlli” hisoblagichlar o‘rnatish belgilangan bo‘lib, bugungi kunda shundan 210 mingta abonent qolgan.
1-avgustgacha qolgan isteʼmolchilar ham “aqlli” hisoblagichlar bilan taʼminlanadi. Natijada, ko‘rsatkich 100 foizga yetkazilishi, yaʼni mavjud 8,5 mln abonent qamrab olinishi kutilmoqda.
“Bir narsani aytish kerakki, mamlakatda 100 foiz “aqlli” energiya hisoblagichlari o‘rnatildi, deb bo‘lmaydi, nimaga deganda, yillik o‘sish 2 foizni tashkil etadi: aholi ko‘paymoqda, uy-joy qurilmoqda, ishlab chiqarish ortmoqda. Shunday ekan, ko‘rsatkichni 100 foizga yetkazib bo‘lmaydi”, dedi u.
Izoh (0)