Xonanda Zohida Umarova “Mirsodiqova bilan” YouTube kanaliga bergan intevryusida o‘g‘li Yorqinxo‘janing Ozodbek Nazarbekovning qizi Zinnura bilan qanday tanishgani haqida so‘zlab berdi.
— Hech kim hech kimga sovchi bo‘lmadi. Ikki yosh bir-birini Instagram’dan topib, sevishib qolgan. Qizim Yorqinxo‘jaga “O‘zbekistonda o‘z yo‘nalishi bilan chiqayotgan xonandalardan birisiz”, deb yozgan o‘g‘limga. Yorqinxo‘ja: “Millionlab yozilgan xatlar orasidan shu qizning yozganiga e’tibor berib, chiqib ketaman. Buncha aqlli bu qiz, deyman. Ko‘rmay sevdim bu qizni”, deydi. Bolam indamay yuraverarkan. Men undan qachon uylanasan, deb so‘rayveraman, u esa indamaydi. Qizimiz yosh bo‘lgani uchun indamay yurgan ekan bolam. Zinnuraxonni nikoh kunigacha ko‘rmadik. Yorqinxo‘ja ham qizimizni o‘sha kuni ko‘rdi. Yorqinxo‘ja hech bo‘lmasa, yuzingizni yarmini ko‘rsam maylimi, desa ham qizim “Yo‘q”, derkan.
Unashtirilganidan so‘ng bir kuni Yorqinxo‘ja kelib qoldi. “Ayajon, Zinnuraxonni ko‘rganimda yoqmay qolsa-chi?”, deb so‘radi. Men shokka tushib qoldim. “Uni ko‘rmaganmisan?”, desam “yo‘q”, dedi. Shundan keyin “Endi nima bo‘lsa ham uylanasan. Nimaga ikkilanyapsan? Onasini qara, qanday chiroyli. Ko‘zlari charos. 20 yoshida qolib ketgan, umuman qarimagan. U onadan tug‘ilgan qiz albatta chiroyli bo‘ladi”, dedim. Onasini shunaqa sevdim. Shunaqa aqlli, farosatli ayol ekanki, menga “Zohida opa, farzandlaringizni yolg‘iz boshingiz bilan o‘stirgansiz, menga fotiha to‘yi, unashtiruvlar kerak emas. Faqat nikoh o‘qitib, qizimni o‘sha kuni olib ketaveringlar”, dedi. Bu gaplardan judayam xursand bo‘ldim.
Zohida Umarova, shuningdek, Ozodbek Nazarbekov bilan suhbati qanday kechgani haqida so‘zlab berdi.
— Bir kuni Ozodbek Nazarbekov meni suhbatga chaqirib qoldilar. “Taqdir-da, Yorqinxo‘jaga buyurgan ekan shu qiz”, dedilar. Yorqinxo‘ja bilan Zinnuraning o‘rtasida judayam bir buyuk muhabbat bor. Bir-birilarini judayam sevishadi. O‘g‘limga “Biror narsadan asabiylashsang, qizimga baqirib yuborma. Menga baqir, onangman, ko‘taraman. Lekin qizimni xafa qilib qo‘yma”, deb tayinlayman. Zinnura juda ham chaqqon. Biz alohida yashaymiz. Ularnikiga kelib qolsam, darrov oldimga yugurib chiqib, “Oyijon keldingizmi?”, deb darrov osh-ovqatni tayyorlab oldimga qo‘yadi.
Ma’lumot uchun, Yorqinxo‘ja Umarov va Zinnuraning to‘yi 2023-yilning 19-sentabrida bo‘lib o‘tdi.
Izoh (0)