NATO bosh kotibi Yens Stoltenbergning fikricha, Rossiya yadroviy doktrinasiga kiritilgan o‘zgartirishlar G‘arbning Ukrainaga yordam ko‘rsatishini oldini olishga urinishdir.
Uning so‘zlariga ko‘ra, har safar G‘arb davlatlari Ukrainani qo‘llab-quvvatlashni kuchaytirganda, “ruslar xalaqit qilishga uringan”. Biroq Stoltenberg Rossiya yadroviy doktrinasidagi o‘zgarishlar hozircha alyans tomonidan hech qanday chora ko‘rishni talab qilmasligini qayd etib o‘tdi.
“Har safar biz yangi turdagi qurollar — jangovar tanklar, uzoq masofaga uchuvchi samolyotlar yoki F-16 qiruvchi samolyotlari bilan qo‘llab-quvvatlovni oshirganimizda, ruslar bizni to‘xtatishga harakat qiladi. Ular muvaffaqiyatga erisha olmadi va bu so‘nggi misol NATO ittifoqchilarining Ukrainani qo‘llab-quvvatlashiga to‘sqinlik qilmasligi kerak”, dedi Stoltenberg Bryusseldagi NATO qarorgohida qilgan chiqishida.
Yens Stoltenberg avvalroq Rossiyaning yadroviy doktrinasiga kiritilgan o‘zgartirishlar NATO a’zolarini “qo‘rqitish”ga qaratilganini aytgandi. U Vladimir Putinning ushbu mavzuga bag‘ishlangan nutqini “xavfli va mas’uliyatsiz ritorika” deb atadi.
O‘tgan hafta Xavfsizlik Kengashi yig‘ilishida Vladimir Putin yadroviy doktrinaga o‘zgarishlarni e’lon qildi. Hujjatga ko‘ra, yadro qurolidan foydalanishga dronlar, raketalar yoki harbiy samolyotlarning ommaviy ravishda uchirilishi haqidagi ma’lumotlar asos bo‘lishi mumkin.
Yangilangan doktrinada, shuningdek, yadroviy davlat ko‘magida yadro quroliga ega bo‘lmagan davlat tomonidan Rossiyaga qarshi tajovuz qo‘shma hujum sifatida qaralishi aytiladi. Keyinroq, 29-sentyabr kuni Kreml yadroviy doktrinaga tuzatishlar allaqachon tayyorlangan va tez orada rasmiylashtiriladi, deb aniqlik kiritdi.
Izoh (0)