Nodirbek Abdusattorov muddatidan oldin chempionlikni qo‘lga kiritdi. Jahon reytingida hozir u to‘rtinchi!

Chexiya poytaxti Praga shahrida Prague International Chess Festival turniri bo‘lib o‘tmoqda.

5-mart, seshanba kuni ushbu musobaqaning 7-tur bahslarida Abdusattorov Vinsent Keymerga qarshi dona surib g‘alaba qozongani haqida xabar berilgan edi. 

6-mart, chorshanba kuni Nodirbek Abdusattorov eronlik Parham Maghsoodlooga qarshi dona surdi. Aynan Parham Nodirbekning eng yaqin ta’qibchisi edi. 

Qiyin kechgan o‘yinda hamyurtimiz kuchli o’yin namoyish etib g‘alabaga erishdi.

Ushbu g‘alabadan so‘ng Nodirbek Abdusattorov onlayn reytingda amaldagi jahon chempioni Ding Lirenni ham ortda qoldirib, dunyoning to‘rtinchi raqamli shaxmatchisi bo‘lib turibdi. Uning ochkolari 2765,5 ga yetdi. 

Bundan tashqari ushbu g‘alaba Nodirbekka musobaqa g‘olibligini ham taqdim etdi. Hozirga kelib uning hisobidagi ochkolar soni 6 taga yetdi. Undan keyingi o‘rinlarda joylashgan Nguyen, Maghsoodloo va Praggnanandha 4,5 ochkodan jamg‘argan. Nodirbek Abdusattorov ertangi turda mag‘lubiyatga uchragan taqdirda ham birinchi o‘rinda qoladi.

Nodirbek Abdusattorov, bugun 7-mart sanasida musobaqaning so‘nggi turida Richard Rapportga qarshi dona suradi. Ushbu uchrashuvning natijasi Nodirbekka qimmatli reyting ochkolari beradi.