Озарбайжоннинг Шуша шаҳрида шахмат бўйича Вугар Гашимов хотирасига бағишланган турнир анъанавий мусобақа ўз якунига етди.
Мусобақа рапид ва блиц йўналишларида ўтказилиб, ғолиб ва совриндорлар икки турнирнинг умумий натижалари йиғиндисига кўра аниқланди.
10-маротаба ташкил этилган ушбу нуфузли турнирда жами 8 нафар гроссмейстер қатнашди. Улар қаторида Нодирбек Абдусатторов ҳам бор.
Нодирбек блиц баҳсларида 10 очко тўплаб ажойиб натижа қайд этди. Россиялик Ян Непомняший иккинчи, ҳиндистонлик Аравиндҳ Читамбарам учинчи ўринни банд этди. Рапид баҳсларида 8 очко тўплаган Нодирбек 4-поғонадан жой олди.
Турнир чемпионлиги учун унга бир очко етмай қолди. Нодирбекдан бир очко кўп жамғарган Ян Непомняший 10-юбилей турнир чемпионига айланди.
Маълумот учун, норвегиялик Магнус Карлсен турнирнинг 4 карра ғолиби ҳисобланади. Шахрияр Мамедяров икки бор чемпионликка эришган бўлса, Фабиано Каруана (АҚШ), Нодирбек Абдусатторов (Ўзбекистон) ва Видит Сантош (Ҳиндистон) бир мартадан бош совринга эга чиққан.
Эслатиб ўтамиз, Нодирбек Абдусатторов Бутунжаҳон шахмат Олимпиадаси якунлангач Тошкентга қайтган ва аэропортда ташкил этилган тақдирлаш маросимида қатнашган. Шундан сўнг, шахматчи Бокуга жўнаб кетган. Чарчоқ аломатларига қарамай ўзбекистонлик спортчи ажойиб натижа қайд этди.
Ушбу мусобақанинг мукофот жамғармаси ҳақида очиқ манбаларда маълумот мавжуд эмас.
Изоҳ (0)